Россиялык окумуштуулар Антарктидадагы “Восток” полярдык станциясында дарбыз өстүрүштү. Бул тууралуу “Новая наука” порталы жазды.
«Восток» станциясында иштеген окумуштуулар көп жылдар бою эң төмөнкү температурада изилдөөлөрдү жүргүзүп келишет. Негизинен алар муз өзөктөрүн изилдешет, ошондой эле метеорология, геофизика, биология жана астрономия тармагында иштерди жүргүзүшөт.
Тема боюнча:
Полярдык станция деңиз деңгээлинен 3488 метр бийиктикте жайгашкан, бул жерде кышында абанын температурасы нөлдөн 80 градуска чейин төмөндөйт.
Бирок мындай шартта да окумуштуулар дарбыз сыяктуу жылуулукту сүйгөн өсүмдүктү өстүрө алышты.
“Бир нече жума мурун Россиянын Арктика жана Антарктика илим-изилдөө институтунун жана Россия илимдер академиясынын Биомедициналык көйгөйлөр институтунун кызматкерлери станцияда дарбыз өстүрүүгө жетишишти”, – деп айтылат порталдын маалыматында.
Бул үчүн изилдөөчүлөр температура, жарык жана нымдуулук ширелүү жемиштер үчүн алда канча ыңгайлуу боло турган шарттарды түзүшкөн. Андан сырткары, команда атмосфералык төмөн басымга жана күнөсканада кычкылтектин жетишсиздигине көнүү жөндөмдүүлүгү менен белгилүү болгон эрте бышкан сорттун эки түрүн атайын тандап алышкан.
Бышкан дарбыздын диаметри болгону 13 сантиметр, салмагы бир килограммдай болуп чыккан. Жердин эң суук жеринде дарбыз 103 күндө бышкан.
