Жогорку Кеңештин депутаты Надира Нарматова Ош облусунун Ноокат районуна жасаган иш-сапарынын алкагында Насирдин Исановдун 80 жылдык мааракесин өткөрүүгө карата уюштуруу иштери менен таанышты.
Бул тууралуу парламенттин Коомчулук жана ЖМК менен иштөө бөлүмү билдирди.
Депутат Зулпуев айыл өкмөтүнүн Кашкалдак айылындагы 120 орундуу балдар бакчасынын, Кара-Таш айыл өкмөтүндөгү 375 орундуу Абдыманап Мамыров атындагы орто мектептин имаратынын курулушу менен таанышты. Аталган обьектилердин курулушу 2014-жылы депутаттын колдоосу алдында башталып, бирок, каражаттын тартыштыгынан токтоп калган. Мааракелик иш-чарага карата мектеп жана бала бакчанын имараттары жаңы окуу жылында пайдаланууга берилүү алдыда турат.
Андан сырткары, депутат Надира Нарматова жумушчу сапарынын алкагында Насирдин Исановдун 80 жылдык юбилейи өтүүчү Көк-Бел айылына барып, көрүлүп жаткан иш аракеттерден кабар алды. Айылга таза суу жеткирүү максатында 76 млн сомдук, Ак-Буура дарыясынан тартылып келүүчү 32 млн сомдук агын суу долбоорлору аткарылып жатат. Көк-Бел айылынын борборуна Насирдин Исановдун айкели орнотулуп, ага Жогорку Кеңештин төрагасынын фондунун эсебинен 500 миң сом каражат бөлүнгөн.
Депутат Надира Нарматова мамлекеттик деңгээлде өткөрүлүп жаткан бул иш чарада жалпы коомчулук, жергиликтүү бийлик бутактары, түзүлгөн уюштуруу штабдары ыкчам аракеттерди жасап, бирдиктүү иш алып барышы шарттыгын айтып, мындай иш-чара өткөрүү той, тамаша менен эле чектелбеш керектигин белгиледи.
Жогорку Кеңештин депутатынын кыдыруусуна Президенттик аппараттын уюштуруу бөлүмүнүн жооптуу кызматкери жана жергиликтүү бийлик өкүлдөрү катышты.
Коомдук жана мамлекеттик ишмер Насирдин Исановдун 80 жылдык мааракеси ушул жылдын 30-августунда өзү туулган Ноокат районунун Көк-Бел айылында белгиленет.
