Нигериянын мурдагы президенти Мухаммаду Бухари Лондондогу клиникада каза болду. Бул тууралуу анын жардамчысы Гарба Шеху X социалдык тармагында билдирди.
«Мурдагы президенттин үй-бүлөсү бүгүн түштөн кийин Лондондогу клиникалардын биринде Мухаммаду Бухаринин каза болгонун жарыялады», — деп жазды Шеху.
Нигериянын азыркы президентинин басма сөз катчысынын айтымында, мамлекет башчысы Бола Тинубу Бухаринин сөөгүн мекенине коштоп келүү үчүн вице-президент Кашим Шеттиманы Улуу Британияга жөнөтөт. Ошондой эле Тинубу экс-президенттин жубайы Аиша Бухари менен байланышып, терең кайгыруу менен көңүл айтты.
Пресс-катчы белгилегендей, Бухари Лондон убактысы боюнча саат 16:30да (Москва убактысы менен 18:30да) дүйнө салды. Ал кезде анын жашы 82де болчу.
Мухаммаду Бухари 1942-жылдын 17-декабрында төрөлгөн. Ал 1983-жылдын декабрында ийгиликтүү аскерий төңкөрүштүн натыйжасында Нигериянын башына келген. Эки жыл бою өлкөнү башкарып турган.
2015-жылы Бухари президенттикке шайланган, андан мурда ал бул кызматка үч жолу – 2003-, 2007- жана 2011-жылдары талапкерлигин көрсөткөн. 2019-жылы кайра шайланган.
Май айында дагы бир мурдагы лидер – Уругвайдын 89 жаштагы экс-президенти Хосе Мухика каза болгону кабарланган. Ал дүйнөлүк ММКларда «дүйнөдөгү эң карапайым президент» катары белгилүү болгон. Президент болуп турган учурда да айылдагы жөнөкөй үйүндө жашап, маянасынын көпчүлүк бөлүгүн кайрымдуулукка берген.
Буга чейин Германиянын мурунку президенти да дүйнө салганы кабарланган.

















