Британ полициясы дем алыш күндөрү Лондондун түндүгүндө жайгашкан синагогага өрт коюу аракетине байланыштуу эки адамды кармады.
Бул тууралуу Reuters укук коргоо органдарына таянып билдирди.
Полициянын маалыматына ылайык, 17 жаштагы өспүрүм жана 19 жаштагы жигит кармалган. Окуя жекшемби күнү таң эрте Kenton United синагогасынын жанында болгон. Өрттүн натыйжасында болгону түтүндөн жеңил зыян келтирилген, жабыркагандар жок.
Улуу Британиянын терроризмге каршы бөлүмү Лондондогу жөөт объектилерине жасалган акыркы бир катар кол салууларды иликтеп, бул окуялардын ортосунда мүмкүн болгон байланыштарды текшерүүдө.
Белгиленгендей, бул акыркы жумалардагы биринчи учур эмес: буга чейин жума күнү жөөт коомчулугуна тиешелүү коммерциялык жайды өрттөө аракети катталган, ал эми өткөн жумада борбордогу башка синагогага өрт коюу иши боюнча дагы эки шектүү кармалган.
















