НАТОнун башкы катчысы Марк Рютте АКШнын Гренландияга болгон дооматтары боюнча комментарий берүү “такыр мүмкүн эмес” экенин билдиргенин РИА Новости жазды.
Ал мындай пикирин Давостогу Дүйнөлүк экономикалык форумда Европанын коопсуздугу боюнча панелдик талкуу учурунда “АКШнын Гренландияга аскердик кийлигишүүсүн реалдуу мүмкүнчүлүк деп эсептейби же жокпу?” деген суроого жооп берүүдөн баш тартып жатып айткан.
“Менден мурункулар да ар дайым мындай маселелер боюнча ачык комментарий бербөөнү чечишкен. Бул мүмкүн эмес”,- деген Рютте.
Буга чейин Марк Рютте АКШ менен Даниянын ортосундагы Гренландия боюнча чыр-чатакты чечүүнүн мүмкүн болгон жолун сунуштагандыгын CNN телеканалы европалык булактарга шилтеме жасап жарыялаган.
Телеканалдын маалыматы боюнча, башкы катчы 1951-жылдагы Гренландияны коргоо келишимин Кытайдын аралга инвестиция салуусуна тыюу салуучу кепилдиктерди киргизүү менен кайра карап чыгууну сунуштаган. Ал бул келишим Вашингтон менен Копенгагендин ортосундагы мамилелердин курчушуна жол бербейт деп эсептейт.
Гренландия Дания Королдугунун бир бөлүгү. Бирок АКШнын президенти Дональд Трамп арал Америка Кошмо Штаттарынын бир бөлүгү болушу керек деп бир нече жолу билдирген.


















