Молдованын бийлиги Көзкарандысыз Мамлекеттер Шериктештигинин (КМШ) курамынан чыгуу жол-жобосун расмий түрдө баштады. Бул тууралуу республиканын тышкы иштер министри жана вице-премьер-министри Михай Попшой жергиликтүү ММКларга берген маегинде билдирди.
Попшойдун айтымында, Кишинёв КМШга мүчөлүктү формалдуу түрдө камсыз кылып келген негизги келишимдерди денонсациялоо процессин баштады. Анын сөзүнө караганда, тиешелүү документтер учурда талкуу стадиясында турат жана жакынкы убакта парламенттин кароосуна жөнөтүлөт.
Айрыкча 1993-жылдын 22-январында Минск шаарында кол коюлган КМШнын Уставы, 1991-жылдын 8-декабрындагы КМШны түзүү жөнүндө Макулдашуу жана ага 1991-жылдын 22-декабрындагы Тиркеме тууралуу сөз болууда.
Бул документтерди денонсациялоо Молдовага юридикалык жактан Шериктештиктеги катышуусун расмий түрдө токтотууга мүмкүндүк берет, деп баса белгиледи министр.
«Бул процесс буга чейин башталды. Чечим кабыл алынды, жана бекитүү жол-жобосу ишке кирди», — деди Попшой.
Ошол эле учурда ал КМШнын алкагындагы айрым макулдашуулар, эгерде алар Молдованын жарандарына практикалык пайда алып келип, өлкөнүн европалык интеграция багытына каршы келбесе, күчүндө калышы мүмкүн экенин белгиледи.
Тышкы саясат ведомствосунун башчысынын баамында, өкмөт февралдын ортосуна чейин ички жол-жоболорду аяктап, андан кийин маселени парламенттин добушуна коёт. «Юридикалык жактан алганда, кыска мөөнөттө Молдова Республикасы мындан ары КМШнын мүчөсү болбойт», — деп билдирди Попшой.
Ал ошондой эле Молдова КМШнын алкагында жалпысынан 283 макулдашууга кол койгонун эске салды. Алардын ичинен 71и буга чейин денонсацияланган, дагы болжол менен 60 келишим токтотуу процессинде турат.
КМШ келишимдеринен чыгуу багыты Кишинёв тарабынан 2023-жылы эле белгиленген. Ошол жылдын май айында парламент Мамлекеттер аралык телерадиокомпания «Мирди» түзүү жөнүндө макулдашуудан чыгуу чечимин кабыл алган, ал эми июль айында КМШга мүчө өлкөлөрдүн Парламенттер аралык ассамблеясы жөнүндө Конвенция денонсацияланган. 2024-жылдын январында бийлик КМШнын алкагындагы 119 макулдашуу өлкө үчүн баалуулукка ээ эмес экенин билдирген. Ошол эле жылдан тартып Молдова КМШга жана анын платформасында иш алып барган түзүмдөргө мүчөлүк төлөмдөрүн төлөөнү токтоткон.
