Бишкектен троллейбус каттамдары толугу менен алынат. Бул тууралуу Бишкек шаарынын мэри Айбек Жунушалиев “Кабар” агенттигине билдирди.
Анын айтымында, мындай кадам менен шаар ичи троллейбус линияларынан тазаланып, учур талабына жараша мобилдүү автобустар эл ташууга киргизилет.
“Биз бардык аракеттерибизди шаар тургундарынын ыңгайлуу шарттарды түзүп берүү үчүн кылып жатабыз. Кыйма-чийме троллейбус линиялары алынат, азыр мына жарнамалык такталар да тазаланууда. Электр өткөрүүчү зымдар, кабелдер жер астына өткөрүлүп жатат. Экинчиден, троллейбус өз багыты боюнча белгилүү бир көчөлөр менен гана жүрөт. Аны убактылуу башка көчөлөргө бура албайбыз. Электробустар жана башка транспорт каражаттары мобилдүү болгондуктан, тыгын маселесин чечүүдө жардамы да тиет. Ошондой эле биз троллейбуска түшкөн жүргүнчүлөрдүн саны кыскарганын да байкап, ушундай чечимге келдик”, – деди Айбек Жунушалиев.
Эске салсак, июндун башында калаадагы негизги жолдорду оңдоо иштери башталганда бир катар жолдордо, анын ичинде Байтик баатыр жана Ахунбаев көчөлөрүндө троллейбус зымдары алынып, бир катар троллейбустук каттамдар өзгөртүлгөн.
Мэр Айбек Жунушалиев 21-июнда Жогорку Кеңеште сүйлөп жатып, 210 чакырымдык троллейбус линиясынын 70% эксплуатациялоо мөөнөтү өтүп кеткенин, аны алмаштыруу кымбат турарын айткан. Ал ушундан улам айлампа линиядагы гана троллейбустар калтырылып, калганы алына турганын, бул тыгынды азайтууга салым кошорун маалымдаган. Мэр шаардагы 152 троллейбустун 100ү Ош шаарына берилерин билдирген.
Былтыр ноябрда Бишкек шаарынын мэриясы борбор калаага алгачкы электробустар 2024-жылдын биринчи жарымында келерин билдирген. Жалпы 120 электробус келиши күтүлүүдө.
Өткөн аптада активисттер, шаар тургундары Бишкек шаарындагы троллейбустарды сактап калууну талап кылган «Акыркы троллейбус» акциясын өткөрүү үчүн “Филармониянын” аялдамасына чогулушкан. Бирок акция милиция тарабынан токтотулган. Буга борбор калаада сентябрдын аягына чейин митингдерди өткөрүүгө тыйуу салган чечим жүйөө келтирилген.
Анда акциянын катышуучулары аталган транспорттун түрү экологиялык жактан таза жана шаардыктар үчүн ынгайлуу экендигин белгилешкен. Мындан тышкары, троллебус линияларын демонтаж кылуу көптөгөн чыгымдарга алып келе тургандыгын айтышкан.



















