29-ноябрда Бишкектеги Эл аралык медициналык университетинде “Коомду трансформациялоо шартында медицинанын, билим берүүнүн жана заманбап илимдердин негизги тенденциялары” аттуу эл аралык илимий-практикалык конференция өттү.
Аталаган иш чара Кара-Кыргыз автономиялуу облусунун түзүлгөндүгүнүн 100 жылдыгына жана университеттин ректору, педагогика илимдеринин доктору, профессор Елисей Елисеевич Синдин 80 жылдыгына арналды.
Конференцияга Эл аралык медициналык университетинин негиздөөчүсү Кубанычбек Жумалиев, тармактык министрликтердин өкүлдөрү, медициналык окуу жайлардын ректорлору, окутуучулары жана студенттери, ошондой эле Кыргызстандын, Россиянын, АКШнын, Азербайжандын, Индиянын, Пакистандын, Египеттин, Казакстандын жана Түркиянын окумуштуулары катышты.
Илимпоздор жана студенттер өз изилдөөлөрүн жана докладдарын сунуштап, медицинанын, билим берүүнүн жана заманбап илимий жетишкендиктердин актуалдуу маселелерин талкуулашып, жалпы 150дөн ашуун илимий доклад жасалды. Анын 100гө жакыны илимпоздор, 50дөн ашуусу студенттер (кыргыз, орус жана англис тилдеринде) жасашты.
Бул конференция ар кайсы өлкөлөрдүн жана медициналык окуу жайлардын адистеринин ортосунда билим жана тажрыйба алмашуу үчүн эң сонун мүмкүнчүлүк, ошондой эле медицина жана билим берүү жаатындагы жаңы идеяларды жана инновациялык мамилелерди талкуулоо үчүн аянтча болду. Анда негизги басым медициналык билим берүүгө, медициналык окуу жайлардагы улуттук жана эл аралык деңгээлде билим берүүнүн бирдиктүү стандарттарын иштеп чыгууга жана жайылтууга, окуу процесстерин өркүндөтүүгө, илимий иштердеги инновациялык ыкмаларга жана башка багыттарга бурулду.
Иш-чаранын соңунда секциялык жыйындардын жыйынтыгы менен тармактык министрликтерге, медициналык коомчулукка сунушттар камтылган резолюция кабыл алынды.
Белгилей кетүүчү жагдай, Эл аралык медициналык университетинде, Пакистан, Индия, Бангладеш, Орусия, Казакстан жана башка көптөгөн чет өлкөлөрдүн студенттери билим алышат. Студенттер үчүн практикалык сабактар атайын лабораторияларда жүргүзүлөт. Бул жаатта университеттин чарбалык бөлүмү бар.
Ал эми лекциялар англис тилинде жүргүзүлөт. Ошондуктан окутуучу, профессордук курам да өз адистигинен тышкары англис тилин мыкты билүүгө тийиш. Ошол эле учурда быйылкы жылы аталган окуу жайда иштегендердин маянасы Кыргызстандагы ЖОЖдордун арасында эң жогорку чекке чыкты.






















