РФнын премьер-министри Михаил Мишустин өлкөнүн экономикасы оппоненттеринин салган санкцияларына карабай ИДПсы өсүп жатканын жана ал тургай айрым мамлекеттердин көрсөткүчтөрүнөн жогорулап да баратканын белгиледи.
«Оппоненттер Орусияга каршы 30 миңдей санкция киргизишти, бирок ата мекендик экономика токтоп калган жок жана кайра өсүп жатат»,- деди ал.
Мишустин бул тууралуу «Знание» коомунун билим берүү марафонунун алкагындагы лекцияда сүйлөп жатып билдиргенин ТАСС агенттиги жазды.
«Атаандаштар Орусиянын өнүгүшүн артка тартып, инновацияларга жана ресурстарга жетүүгө бөгөт коюуга аракет кылып жатышат. Микроэлектроника, станоктор жана жабдуулар, учактар, дары-дармектер жана медициналык буюмдар. Мунун баары чектөө чараларынын объектисине айланды, алардын 30 миңге жакыны биздин мамлекетке каршы киргизилген. Ушундай тоскоолдуктарга карабастан, орус экономикасы өзүнүн өнүгүү темпин сакталып калды», – деп баса белгиледи ал.
Премьер-министр президенттин жетекчилиги астында өкмөт бир катар чечимдерди кабыл алгандыгын кошумчалады.
Ал белгилегендей, Орусиянын ИДПсы өсүп, өнүккөн өлкөлөрдүн көрсөткүчтөрүнөн кыйла ашкан.
Эске сала кетсек, Орусияга салынган санкциялардын негизги себеби Орусия-Украина жаңжалына байланыштуу.
Эки өлкөнүн ортосунда тирешүү башталгандан кийин 60тан ашык өлкө Орусияга каршы санкцияларды киргизген.
Алардын арасында АКШ, Улуу Британия, Канада, Жаңы Зеландия, Япония жана башка өнүккөн мамлекеттер бар.
2022-жылдын 7-мартына карата Орусия санкциялардын саны боюнча Иранды басып өткөн. Ошол эле жылдын 22-мартына карата санкцияларга кабылган орусиялык жеке жана юридикалык жактардын саны 7116га жеткен.



















