Бүткүл дүйнөлүк саламаттыкты сактоо уюмунун (ДССУ) башчысы Тедрос Адханом Гебрейесус Ливандын ооруканалары жаракат алган бейтаптардын көптүгүнөн улам толуп , өлкөнүн саламаттыкты сактоо системасы кыйынчылыкка туш болгонун билдирди.
“Ливанда каза болгондордун саны өсүп, ооруканалар жарадар болгон бейтаптардын агымына толуп калды. Саламаттыкты сактоо системасы удаа-удаа кризистерден улам алсырап, эбегейсиз муктаждыктарга кыйынчылык менен туруштук берүүдө”, – деп жазды Гебрейесус өзүнүн Х соцтармактагы баракчасына.
ДСУнун башчысынын айтымында, ал Женевадагы Араб мамлекеттери лигасынын элчилери менен жолугуп, Ливандагы жана жалпы региондогу кырдаалды талкуулады.
Гебрейесус ДССУ Ливандын Саламаттыкты сактоо министрлиги менен ооруканаларды жетиштүү медициналык буюмдар менен камсыз кылуу жана медициналык кызматкерлерди окутуу үчүн тыгыз кызматташып жатканын билдирди.
Ал ошондой эле «мындан да чоң жоготууларды жана азаптарды» болтурбоо үчүн аймактагы зордук-зомбулук токтотулушу керектигин белгилеп, чыр-чатактын мындан ары курчушу, «реги үчүн катастрофалык кесепеттерге алып келерин эскертти.
Израиль 1-октябрдан бери Ливандын түштүгүндө “Хезболла” күчтөрүнө каршы кургактан операция жүргүзүп, коңшу өлкөнү абадан бомбалоону улантууда. Андан улам миңден ашуун адам, анын ичинде “Хезболла” кыймылынын лидерлери каза болуп, 90 миңден ашуун адам качкын болду. “Хезболла” жоготууларга карабастан, кургактан салгылашууларды жүргүзүүдө жана Израилдин аймагына ракеталык чабуулдарды жасап жатат.
Ливандагы кырдаал гуманитардык катастрофага алып келиши мүмкүн экенин буга чейин Бириккен Улуттар Уюмунан билдиришкен.
БУУнун Адам укуктары боюнча Жогорку комиссарынын кеңсесинин басма сөз катчысы Элизабет Тросселл Женевадагы брифинг учурунда Ливандагы кырдаал бүтүндөй аймакты гуманитардык жана адам укуктары боюнча катастрофага алып келиши мүмкүн деген реалдуу коркунуч бар экенин билдирген.


















