Кытайда тик учуп-конууга жөндөмдүү (eVTOL) жүк ташуучу электр учагынын учуусу ийгиликтүү ишке ашырылды.
Өздүк өндүрүштөгү эки тонналык учак Хуэйчжоу 19-3 деңиз платформасына жүк жеткирүү үчүн деңиздин үстүнөн 150 километрден ашык аралыкты басып учуп өттү.
AutoFlight компаниясы тарабынан жасалган CarryAll деп аталган учак бардык керектүү сертификаттарды, анын ичинде өндүрүшкө уруксатты жана учууга жарамдуулугун алды.
Бул жолу учак кургактан платформага чейин 58 мүнөттүк учуу жасап, жаңы мөмө-жемиштерди жана керектүү нерселерди жеткирди. Бул долбоордун технологиялык мүмкүнчүлүктөрүн көрсөтүү жана көптөн бери келе жаткан логистикалык көйгөйдү чечүү үчүн жасалган.
Алыскы деңиз платформаларына кемелер менен салттуу жүк жеткирүү 10 саатка жакын убакытты талап кылат, ал эми тик учактар ылдамыраак болсо да, өтө кымбатка турат. Ал эми электрдик eVTOL — тез, үнөмдүү жана экологиялык жактан таза.
Сыноо ирээтиндеги учуу эң алдыңкы технологияны деңиз операцияларынын практикалык муктаждыктары менен айкалыштырды, жүктөрдү шашылыш жеткирүү, алыстан көзөмөлдөө жана ал тургай мыйзамсыз балык уулоо менен күрөшүү үчүн жаңы мүмкүнчүлүктөрдү ачты.
CarryAll гибриддик көтөргүч жана круиз системасы менен жабдылган, ал 200 км/саат ылдамдыкта 200 километрге чейин учууга мүмкүндүк берет.
Учак Түштүк Кытай деңизинин татаал шарттарын – туманды, жогорку нымдуулукту жана катуу шамалды ийгиликтүү жеңип, электр авиациясы татаал шарттарда коммерциялык колдонууга даяр экенин далилдеди.



















