Кытайлык окумуштуулар абада учуп, сууда да сүзө ала турган дүйнөдөгү биринчи учкучсуз учуучу аппарат жасашты. Ал суу астында жүрүүчү кемеден учурулат.
Бул тууралуу South China Morning Post басылмасы жазды.
Окумуштуулардын айтымында, канаттары бүктөлө турган уникалдуу конструкциянын аркасында учкучсуз учак абада учуу учурунда суу менен абанын ортосунда бир нече жолу маневр жасай алат. Бул анын жашырынуу жана аман калуу мүмкүнчүлүктөрүн олуттуу жакшыртат.
Аппарат учуу үчүн колдонгон канаттар сууда 5 секундада бүктөлүп, фюзеляжга бекем орнойт, бул суунун каршылыгын бир топ төмөндөтөт жана атайын винттер суу астында кыймылды камсыз кылат.
Түндүк-Батыш Политехникалык университетинде (NWPU) Кытайдын аэродинамикалык изилдөө жана өнүктүрүү борбору (CARDC) менен биргеликте иштелип чыккан пилотсуз учак суу астындагы кемеден учурулат жана миссия аяктагандан кийин кайра ордуна кайтып келет.
Абадагы жогорку маневрдүүлүк жана сууда иштөө жөндөмдүүлүгүнөн улам дронду чалгындоо жана сокку уруу үчүн колдонуууга болот.
Басылма азыркы коргонуу технологиялары мындай куралдарды токтото албастыгын кошумчалады.


















