Кытайдын Сямынь портунан чыккан алгачкы контейнер поезд Өзбекстанга жетти.
Бул тууралуу “Узтемиржолконтейнер” ишканасынын маалымат кызматы кабарлады.
Билдирүүдө тиричилик техникалары жүктөлгөн 40 футтук 39 контейнер 14 күндөн кийин, 25-июнда Ташкенттеги Сергели станциясына жеткени жазылган.
Маалым болгондой маршруттук поезд муздаткыч, кир жуугуч машина жана газ плиталарын ташып келди.
Маалыматка караганда, контейнерлер Кытайдан деңиз аркылуу Ирандын Бандар-Аббас портуна жеткирилип, андагы темир жол платформаларына жүктөлүп, Түркмөнстан аркылуу Өзбекстандын аймагына кирген.

Буга чейин Өзбекстандын Транспорт министрлиги Кытайдын Ланжоу станциясынан Ташкентке блок поезди жөнөтүлгөнүн, бул каттам “Кытай-Кыргызстан-Өзбекстан” транспорт коридору аркылуу жүк ташуу максатында башталганын айткан.
Өзбекстан менен Иран Түркмөнстан аркылуу мультимодалдык коридорду өнүктүрүү боюнча да макулдашышкан.


















