Бүгүн, 7-сентябрда КР Коргоо министрлигинин 20636 аскер бөлүгүнүн окуу-машыгуу борборунун аймагында Жамааттык Коопсуздук жөнүндө келишим Уюмунун (ЖККУ) “Өз ара аракеттенүү – 2024”, “Издөө-2024” жана “Эшелон-2024” атайын машыгууларынын ачылыш аземи болуп өттү.
Коргоо министрлигинин маалымат кызматынан билдиришкендей, машыгуунун ачылышынын алдында 1941-1945-жылдардагы Улуу Ата Мекендик согуштагы Жеңиштин эстелигине гүлчамбарларды коюу аземи болду.
Ага Коргоо министри генерал-лейтенант Бактыбек Бекболотов, ЖККУнун Баш катчысынын орун басары Таалатбек Масадыков, ЖККУнун Бириккен штабынын башчысы генерал-полковник Андрей Сердюков, президенттин Ысык-Көл облусундагы ыйгарым укуктуу өкүлү, Балыкчы шаарынын мэри, улуттук аскердик контингенттердин башчылары катышты.
Коргоо министри Бактыбек Бекболотов эл аралык машыгуунун катышуучуларына жана конокторуна кайрылып жатып, динамикалуу өзгөрүп жаткан дүйнөдө коопсуздук биринчи кезектеги маанилүү маселе болуп жаткандыгына байланыштуу, бул жаңы кадамдарды, натыйжалуу координацияны жана так чечимдерди талап кыларын белгиледи.
“Азыркы реалдуулукту эске алуу менен алдыда боло турган машыгуу барган сайын олуттуу мааниге ээ болууда. Учурда өз ара аракеттенүүнү колдоп гана тим болбостон, бизден аскердик мамилелер чөйрөсүн ырааттуу түрдө кеңейтүүнү талап кылат. Бул машыгуу бөлүкчөлөрдүн ыкташуу деңгээлин гана жогорулатпастан, күжүрмөн шериктештикти бекемдеп, дүйнөлүк коомчулукка пайда болгон коркунучтарга карата биздин мамлекеттердин жетекчилигинин бирдиктүү көз караштары бар экендигин көрсөтөт”,- деп баса белгиледи коргоо министри.
Кыргызстандын коргоо ведомствосунун жетекчиси алдыдагы машыгуулар регионалдык коопсуздукту бекемдөө жолундагы кезектеги кадам болорун айтып, биргелешкен аракеттердин аркасында алдыга коюлган милдеттер аткарыларына ишеним билдирип, машыгуунун бардык катышуучуларына ийгиликтерди каалады.
Машыгууга Кыргызстандын, Беларустун, Казакстандын, Орусиянын жана Тажикстандын улуттук контингенттери катышат. Мындан тышкары, ЖККУнун катчылыгынын жана биргелешкен штабынын өкүлдөрү тартылат.
Аскердик машыгууларга 1500ден ашык аскер кызматкери катышат жана 200дөн ашык аскердик техникалар, анын ичинде 10го жакын учак жана 10 деңиз кемеси тартылат.



















