Кыргызстандын Ирандагы элчиси Турдакун Сыдыков Ислам республикасынын Балык чарба уюмунун башчысы Хосейн Хосейни менен жолугушту.
Жолугушууда тараптар айыл чарба, мал чарбасы жана балык чарбасы жаатында кызматташуунун келечегин талкуулашты.
Сыдыков учурда Кыргызстанда балык өнөр жайы тездик менен өнүгүп жатканын билдирди.
Ал ошондой эле Кыргызстандын уникалдуу табияты, климаты жана географиялык жайгашуусу ар кайсы өлкөлөр арасында чоң суроо-талапка ээ болгон форель балыктарынын ар кандай түрлөрүн өстүрүүгө мүмкүндүк берерин белгиледи.
Буга байланыштуу элчи иран тарапка балык чарбасы жаатында тажрыйба алмашуу боюнча иштерди активдештирүүнү, ошондой эле Кыргызстандын аймагында балык тоюттарын жана компоненттерин биргелешип өндүрүү мүмкүнчүлүгүн карап чыгууну сунуштады.
Өз кезегинде Хосейни кыргыз тараптын сунушун колдоп, кызматташуунун потенциалын жана келечегин изилдөө жана эки тараптуу келишимдерге кол коюу максатында ишкерлердин, технологдордун жана инвесторлордун арасынан делегациялардын өз ара сапарларын уюштурууну сунуштады.
Бул контекстте иран тарап муздак суудагы балыктарды өстүрүү тажрыйбасын жана ыкмаларын үйрөнүү максатында Кыргызстандын делегациясынын Ирандын өнөр жай шаарларына жана провинцияларына сапарын уюштурууга даяр экендигин билдирди.
