Баткен шаарында 2021-жылдын апрелинде жана 2022-жылдын сентябрь айларында кыргыз-тажик чек арасындагы жаңжалдарында курман болгондор эскерилди.
Маркумдарга арналган эстелик алдында уюштурулган иш-чарага каза болгон жоокерлердин ата-энелери, жакындары, жергиликтүү бийлик өкүлдөрү катышты.
Президенттин Баткен облусундагы ыйгарым укутуу өкүлү Абдикарим Алимбаев сүйлөгөн учурда чек ара маселеси жакын арада чечилерин айтты.
Ал “Чек араны тез арада чечүү үчүн мамлекет жетекчилиги тынымсыз аракет жасап жатат. Чек ара жакын арада чечилет. Андан кийин Баткендин өнүгүүсү дагы да тездейт. Мекен үчүн курман болгондорго таазим кылабыз”, – деди.
Чек ара чырларынан кийин эки тараптан чек араны тактоо иштери жүргүзүлүүдө.
Өткөн айда 972 чакырымдай кыргыз-тажик чек арасынын тактала элек төрт пайыз гана бөлүгү калганы айтылган.
Эскерте кетсек, Кыргызстан менен Тажикстандын ортосунда чек аранын тактала электигинен улам 2021-жылы 29-апрелде, андан кийин 2022-жылы 14-17-сентябрда ортодо кагылыштар болгон.
Жаңжалда адам өмүрүн алган каргашалуу окуялар катталып, бир катар үйлөр, социалдык объектилер талкаланган.
Бул окуядан кийин Кыргызстан кошуна өлкө менен өзүнүн чек арасын жапкан.
Белгилей кетүүчү жагдай, Кыргызстан менен Тажикстан чек ара маселеси боюнча бир нече принципиалдуу чечимге келгендигин УКМКнын төрагасы Камчыбек Ташиев билдирген.
Ташиев эки өлкөнүн делегациялары жетишкен чечимдер чек ара боюнча негизги маселени чечүүгө жакындатканын белгилеген.



















