Бүгүн 29-апрелде Кыргызстан, Өзбекстан, Тажикстан өлкөлөрүнүн чектешкен жериндеги Стелла аймагында, Баткен районунун Төрт-Гүл айыл аймагынын Кошмоло жерлигинде кыргыз-тажик чек арасына зым тартуу (демаркация) иштери башталды.
Демаркация иштерин баштоого Улуттук коопсуздук боюнча мамлекеттик комитеттин (УКМК) төрагасы Камчыбек Ташиев онлайн форматта катышып, старт берди.
Бул тууралуу президенттин Баткен облусундагы ыйгарым укуктуу өкүлүнүн басма сөз кызматы билдирди.
Иш чарага жеринен УКМК төрагасынын биринчи орун басары, мамлекеттик чек ара кызматынын директору Абдикарим Алимбаев, Минкабдын чек ара маселелери боюнча атайын өкүлү Назырбек Бөрүбаев, президенттин Баткен облусундагы ыйгарым укуктуу өкүлү Айбек Шаменов жана чек арачылар катышты.
Маалыматта белгиленгендей, чек араны тосуу иштери үчүн бул аймакка атайын талаа шаарчасы курулуп,чек арачылар үчүн шарттар түзүлгөн. Атайын техникалар алынып келинген. Биринчи этапта 420 км аралыкта кыргыз-тажик мамлекеттик чек арасына зым тартылат. Чек арага зым тартуу иштерин ушул жылдын аягына чейин бүткөрүү пландалган.
Эске сала кетсек,13-мартта Бишкекте Кыргызстан менен Тажикстандын мамлекеттик чек арасы жөнүндөгү келишимге эки өлкөнүн президенттери – Садыр Жапаров менен Эмомали Рахмон кол койгон.
31-мартта президенттер Тажикстандын Ходжент шаарында ратификациялык грамоталар менен алмашуу жөнүндө протоколго кол коюшуп, документ алмашуу менен чек ара тактоодогу делимитация процесси толук бүткөн.
Кошумчалай кетсек, өлкөлөрдүн ортосундагы мамлекеттик чек аранын жалпы узундугу 1006,84 чакырымды түзөт. Анын ичинен 519,9 чакырым чек ара сызыгы 2011-жылга чейин такталган. Калган 486,94 чакырым тилкеси акыркы үч жыл ичинде такталды.
Буга чейин эки өлкөнүн жарандарынын ортосунда жол, жер жана суу талашынан улам чыр-чатактар чыгып турган. Мунун дагы бир себеби кошуна мамлекеттердин жарандарынын отурукташуусу шахмат түрүнө айланып калышы да маселе жаратып турган.
Акыркы чыңалуу 2021-2022-жылдардагы кандуу окуялардын келип чыгышына түрткү берген.






















