Ал теракт жасагандарга акча которууга шектелүүдө.
Москванын Басман райондук соту 22-майга чейин «Крокус Сити Холл» концерттик залында теракт жасоого шектелген онунчу айыпкерди кармады. Ал Тажикстандын жараны Якубжон Юсуфзода экендигин РБК маалымат каражаты Москванын сотторунун жалпы юрисдикциясынын пресс-кызматына таянып жазды.
«Тергөөнүн маалыматына ылайык, терактка чейин бир нече күн мурда ал өзүнүн банк картасы аркылуу терак жасагандардын жашоосун камсыз кылуу үчүн алардын бирине акча которгон. Ал эми акчанын бир бөлүгү алардын бирине кылмыш жасалгандан кийин которулган», — деп айтылат Тергөө комитетинин телеграм-каналында.
Бирок кимге экендиги такталган эмес.
Я. Юсуфзодага РФнын ККнын 205-беренесинин 3-бөлүгүнүн «б» пунктуна (теракт) ылайык айып коюлду.
Якубжон Юсуфзода 25 жашта, билими орто. Үй-бүлөлүү, үч баласы бар. Кармалган учурда курулуш ишканасында мыйзамсыз иштеп жаткандыгы аныкталган. Анын Москвада убактылуу каттоосу болгон.
Жалпысынан «Крокустагы» теракт боюнча он адамга айып коюлду.
Mash басылмасы Юсуфзода «Нелегал» операциясы учурунда кокусунан кармалгандыгын жазды. 25-мартта аны бир таанышы менен жолдо бараткан учурда патруль байкап калганда, алар жашынууга аракет кылышкан. Бирок полиция аларды кууп жетип, Юсуфзода документтерин көрсөтүүдөн баш тарткандыктан, милиция бөлүмүнө жеткирилген. 26-мартта ал 12 суткага камалган.
Мындан мурда «Крокустагы» теракт боюнча 12 шектүү кармалгандыгы маалымдалган, алардын төртөөсү – түздөн-түз аткаруучулар.
Кармалгандардын көпчүлүгү – Тажикстандын жарандары.

















