Сауд Арабиясынын “Аль-Наср” клубунда ойногон португалиялык чабуулчу Криштиану Роналду Душанбеге барбайт. Бул тууралуу varzishtv.tj сайты жазды.
Басылманын маалыматына караганда, Ирандын “Персеполис” командасына каршы оюнда жаракат алган Роналду толук калыбына келе элек.
“Буга байланыштуу команданын жетекчилиги ага эс алууга убакыт берүү чечимин кабыл алган. Тилекке каршы, Роналдунун оюнун өз көзү менен көргүсү келген көптөгөн футбол күйөрмандарынын каалоосу орундалбай калды”, – деп жазды varzishtv.tj.
АФК Чемпиондор лигасынын “Е” тайпасындагы Душанбенин “Истиклол” жана Сауд Арабиясынын “Аль-Наср” командаларынын ортосундагы беттеш 5-декабрда Душанбедеги Борбордук стадиондо өтөт. Тажикстандын мамлекеттик “Ховар” агенттиги жазгандай, бул оюндун алдында бүгүн эки команданын өкүлдөрү маалымат жыйынын өткөрүшөт.
Анда журналисттердин суроолоруна тажик тараптан “Истиклолдун” башкы машыктыруучусу Игорь Черевченко менен жарым коргоочу Эхсони Панжшанбе, саудия тараптан “Аль-Насрдын” башкы насаатчысы Луиш Каштру жана оюнчулардын бири жооп беришет.
Учурда “Е” тайпасында 13 упайы менен “Аль-Наср” биринчи орунда келе жатат. Ал Чемпиондор лигасынын плей-офф бөлүгүнө мөөнөтүнөн мурда чыкты.
Экинчи орунга сегиз упайы менен Ирандын “Персеполис”, үчүнчүгө төрт упай менен Катардын “Аль-Духайл” командасы жайгашса, Душанбенин “Истиклол” клубу эки упайы менен акыркы сапта.
