Кыргызстандын Тышкы иштер министринин орун басары Авазбек Атаханов бүгүн, 11-январда Ирандын Бишкектеги элчилигине барып, Керман шаарындагы терактка байланыштуу элчиликте ачылган Көңүл айтуу китебине жазуу калтырды.
Бул тууралуу Тышкы иштер министрлигинин маалымат кызматы билдирди.
“2024-жылдын 11-январында Кыргыз Республикасынын Тышкы иштер министринин орун басары Авазбек Атаханов ү.ж. 3-январында Керман шаарында болгон террордук жардыруунун курмандыктарын эскерүү үчүн Кыргыз Республикасынын Тышкы иштер министрлигинин атынан Иран Ислам Республикасынын Кыргыз Республикасындагы Элчилигинде ачылган Көңүл айтуу китебине жазуу калтырды”, – деп айтылат маалыматта.
Буга чейин Керман шаарында жасалган терактынын кайгылуу кесепеттерине байланыштуу Иран тарапка президент Садыр Жапаров, Жогорку Кеңештин төрагасы Нурланбек Шакиев жана Тышкы иштер министри Жээнбек Кулубаев көңүл айткан.
Эске салсак, үстүбүздөгү жылдын 3-январында Ирандын түштүк-чыгышында жайгашкан Керман шаарындагы көрүстөндө ирандык генерал Касем Сулейманини эскерүү иш-чарасы өтүп жаткан учурда көрүстөнгө жакын жерде кош жарылуу болгон. Расмий маалымат боюнча, кол салуудан 95 адам каза таап, жалпысынан 284 адам жаракат алган. Терактка жоопкерчиликти “Ислам мамлекети” экстремисттик тобу өзүнө алган.
Иран өкмөтү 4-январды улуттук аза күнү деп белгилеген.
Ислам революциясынын сакчылар корпусунун “Кудс” бөлүгүнүн кол башчысы Касем Сулеймани 2020-жылдын 3-январында Багдаддын жанындагы аэропортко бараткан жолдо америкалык дрондун соккусунан каза тапкан, сөөгү өзү туулуп-өскөн Керман шаарына коюлган.



















