Түштүк Кореянын “СеулАсан” кайрымдуулук фонду 16-19-июлга чейин Бишкек шаарында текшерүү жана дарыланууга муктаж болгон кыргызстандыктарга акысыз медициналык кызмат көрсөтүүнү пландап жатат.
Бул туурасында бүгүн, 31-майда Корея Республикасынын Кыргызстандагы элчилигинин консулу Пак Ки Сок Саламаттык сактоо министри Гүлнара Баатырова менен жолугушуусунда билдирди.
Саламаттык сактоо министрлигинин маалымат кызматынан билдиришкендей, бул демилгелүү долбоор Кыргызстандын калкына медициналык жардамдын жеткиликтүүлүгүн жана колдоону жакшыртууга багытталган.
“Алдын ала маалыматтар боюнча, ар кандай профилдеги 90го жакын волонтер дарыгерлер: хирургдар, кардиологдор, стоматологдор, ЛОР, окулисттер, аллергологдор, пластикалык хирургдар, педиатрлар, кыргызстандыктарга медициналык жардам жана консультацияларды бекер өткөзүшөт”, – деп айтылат маалыматта.
Кореялык адистер операцияларга жана текшерүүлөргө керектүү жабдууларды, керектүү дары-дармектерди өздөрү менен кошо алып келишет.
Саламаттык сактоо министри Гүлнара Баатырова Корея Респуликасынын консулуна Кыргызстандагы медициналык тейлөөнү жакшыртууга көрсөткөн колдоосу жана кызыгуусу үчүн ыраазычылык билдирди.
Ал ыктыярдуу дарыгерлердин келиши медицина тармагындагы эки тараптуу мамилелерди өнүктүрүүдө жана чыңдоодо жана өлкөдөгү саламаттык сактоонун сапатын жогорулатууда дагы бир кадам болорун белгиледи.
