Казакстандын жарандары үчүн Катарда мыйзамдуу түрдө иштөө мүмкүнчүлүгү: катар тарап жол кире, турак жай жана учак билеттерин төлөп берет.
Казакстан Сенатынын депутаттары казакстандыктарга Катарда мыйзамдуу түрдө иштөөгө шарт түзгөн мыйзамды жактырышты. Бул тууралуу Tengrinews.kz маалымат агенттигинин кабарчысы билдирди.
Сенатор Руслан Рустемов түшүндүргөндөй, казакстандыктардын Катарда ишке орношуу тартиби төмөнкүдөй болот:
-
адегенде катардык иш берүүчү талапкерлерге коюлган шарттарды, эмгек шарттарын жана келишим мөөнөтүн көрсөткөн арыз берет;
-
андан соң Катар Эмгек министрлиги бул арыздарды Казакстанга жөнөтөт;
-
Казакстанда тиешелүү талаптарга жооп берген талапкерлерди электрондук эмгек базары аркылуу тандоо башталат.
Ар бир жумушчу менен иш берүүчүнүн ортосунда эмгек келишими түзүлөт. Ал эки өлкөнүн министрликтери жана элчиликтери тарабынан катталат.
Келишим боюнча катардык иш берүүчү төмөнкүлөргө милдеттүү болот:
-
жумушчуга жашоо жайын берүү же анын ордуна акчалай компенсация төлөө;
-
жол кире же учак билеттерин төлөп берүү;
-
медициналык жардам көрсөтүү;
-
жыл сайын акы төлөнүүчү эмгек өргүүсүн берүү.
Ошол эле учурда катардык иш берүүчү өзүнүн келишим боюнча милдеттеринен эки эле учурда бошотулат:
-
Эгер жумушчу келишим мөөнөтү бүтө электе өз ыктыяры менен иштен кетсе;
-
Эгер жумушчу олуттуу мыйзам бузууларды жасап, аны алдын ала эскертүүсүз жана компенсациясыз иштен бошотууга негиз болсо.
Эмне кылганда жумушчу мыйзам бузган болуп эсептелери тууралуу Эмгек жана социалдык коргоо биринчи вице-министри Аскарбек Ертаев мындай деп түшүндүрдү:
«Коомдук кызыкчылыктарга каршы келген аракеттер деп Катар мамлекетинин мыйзамдарына, маданий жана диний нормаларына каршы жүрүм-турум саналат. Мисалы, мыйзамсыз жыйындарга катышуу, акцияларды өткөрүү, мамлекетке, динине же жетекчилигине акаарат келтирүү, алкоголь же баңгизат колдонуу, коомдук жерде адепсиз жүрүм-турум көрсөтүү, ошондой эле эмгек тартибин сактабоо сыяктуу аракеттер», — деди Ертаев.
Анын айтымында, Катарга жөнөөр алдында казакстандыктар үч облустагы окутуу борборлорунда атайын нускама алышат. Ал жерде аларга Катардагы жүрүм-турум эрежелери, мыйзамдар, жергиликтүү каада-салттар жана жашоо өзгөчөлүктөрү тууралуу маалымат берилет.


















