6-декабрда Жогорку Кеңешnин депутаттары Балбак Түлөбаев, Алишер Козуев жана Нилуфар Алижанова Ош облусунун Кара-Суу базарында эмгектенген ишкерлер менен жолугушту. Бул тууралуу парламенттин коомчулук жана ЖМК менен иштөө бөлүмү билдирди.
Жолугушууда ишкерлер буга чейин соода кылып, унаа токтотуучу жай жана ашкана катары колдонуп келген жерди Мамлекеттик мүлк фондуна которуу маселеси каралып жатканы айтылып, ага карата соодагерлер арасында нааразычылыктар көп экени белгиленди.
Андыктан аталган маселени кайрадан карап чыгып, ишкерлердин ишмердүүлүгүнө тоскоолдук жараткан жагдайларды токтотуу талабы коюлду.
Депутаттар айтылган талаптар каралып, тийиштүү мекемелер менен бирге мыйзам чегинде чечүү аракети көрүлөрүн билдиришти.
Алсак, жолугушууга келген ишкерлер 300дөй соодагердин өкүлү катары келгенин белгилешти.
Белгилей кетүүчү жагдай, жаңы жылдан тартып өлкөбүздүн ири базарларында соода-сатык менен алектенгендердин патент менен иштөө эрежеси жоюлары тууралуу талап коюлгандан кийин көпчүлүк базарлардагы соодагерлер ага каршы чыгышып, митинг уюштурушкан. Бул жагдайды аларга туура түшүндүрүү үчүн ушул жумада Президент Садыр Жапаров “Дордой” базарынын соодагерлери менен жолугуп, патент системасы дагы алты айга, келерки жылдын июлуна чейин узартыларын билдирген. Ал эми мамлекет башчы 6-декабрда “Кабар” агенттигине берген маегинде эгер базарларда митинг токтобой турган болсо, анда Кумтөр сыяктуу убактылуу сырткы башкаруу киргизилерин айткан.
Ал эми 6-декабрда УКМК төрагасы Камчыбек Ташиев базар ээлеринен ижара акысын азайтууну талап кылган. УКМК төрагасынын маалыматы боюнча, ар бир контейнер соодагерлерге айына 3 миң доллардан 7 миң долларга чейин ижарага берилет. К. Ташиев мындан тышкары сатуучуларды бекер ККМ аппараты менен камсыз кылуу керектигин да айткан.



















