Австралия, Улуу Британия жана башка өлкөлөрдүн окумуштуулары катышкан эл аралык изилдөө тобу мөңгүлөрдүн тез эришинин кесепеттери боюнча кеңири талдоо жүргүздү. 160 илимий эмгекке негизделген изилдөөнүн жыйынтыгында, бул процесс дүйнө жүзү боюнча экосистемаларда кайтарылгыс өзгөрүүлөрдү жаратып жатканын аныкташкан.
Изилдөө Nature Reviews Biodiversity (NRBD) аттуу илимий журналда жарыяланган.
Жаңы Зеландия университетинин профессору Шэрон Робинсондун айтымында, миңдеген жылдардан бери сакталып келген мөңгүлөр планетанын экологиялык абалынын өзгөчө көрсөткүчү болуп саналат. Алардын ылдам жоголуусу — божомолдорго ылайык, 2050-жылга чейин дүйнө мөңгү массасынын үчтөн бир бөлүгүн жоготот — ошол шарттарда жашоого ылайыкташкан миңдеген жаныбарлардын түрлөрүнүн жашоосуна коркунуч жаратат.
Мөңгүлөрдүн эриши экологиялык проблемалардын бүтүндөй бир чынжырын жаратат: океан агымдарынын өзгөрүшүнөн жана деңиз деңгээлинин көтөрүлүшүнөн тартып, жергиликтүү экосистемалардын кыйрашына чейин. Айрыкча тынчсыздануу туудурган маселе — таза суу ресурстары. Жер жүзүндөгү таза суунун төрттөн үч бөлүгү мөңгүлөрдө сакталган. Алардын тез эриши суу коопсуздугун бузуп, адамдарга жана суу экосистемасындагы өзгөчө жаныбарларга коркунуч жаратат.
Окумуштуулар баса белгилешкендей, мөңгүлөрдүн эриши менен аларга ылайыкташкан өзгөчө жаныбарлар жоголуп, алардын ордуна универсалдуу түрлөр келет. Бул болсо биологиялык ар түрдүүлүктүн кыскаруусуна алып келүүдө.



















