Италиядагы акы төлөнүүчү пляждар кымбат баалардан улам бош калды. Айрым аймактарда төрт адамдан турган үй-бүлө күнүнө шезлонг жана күндөн калакалоочу чатырларды ижарага алуу үчүн 100 евродон ашык төлөөгө аргасыз болууда.
Der Spiegel маалыматы боюнча, бул акы төлөнүүчү пляждарга келгендердин санынын кыйла кыскаруусуна алып келди.
7500 чакырымдан ашуун жээк сызыгы мамлекетке таандык болгону менен, пляждардын жарымынан көбү жеке операторлорго ижарага берилет. Алардын көбү орто кирешелүү адамдар үчүн жеткиликсиз бааларды коюшат. 2024-жылы эки шезлонг жана күндөн калкалоочу чатырдын ижарасы орточо 30 евро болсо, 2025-жылы баа кыйла өстү. Мисалы, Санта-Маринелледеги La Perla del Tirreno курортунда — күнүнө 60 евро. Мындан тышкары, капучино 5 евро, ал эми тунец кошулган чизбургер 14 евро турат.
Тосканада жайгашкан элиталык Twiga пляжында август айында «бийликтин чатырын» ижарага алуу күнүнө 1500 евро турат, муну менен тамак-аш жана ичимдиктер эсепке алынбайт.
Италиянын Assobalneari Italia туристтик ассоциациясынын маалыматы боюнча, быйылкы сезондо акы төлөнүүчү пляждардын катышуучулары 25–30% га кыскарган. Тармакта 15-августтагы Феррагосто майрамына карата суроо-талап өсөт деп үмүттөнүшөт, бирок бир күн бүт сезондогу жоготууларды жаппайт.
Ассоциациянын президенти Фабрицио Ликордари муну инфляция жана үй-бүлөлөрдүн сатып алуу жөндөмдүүлүгүнүн төмөндөшү менен байланыштырды. Италиянын туризм министри Даниэла Сантанче болсо кризис тууралуу билдирүүлөрдү «паника жараткан» жана «адаштыра турган» деп сыпаттады.



















