Испаниянын түндүгү жана түштүгүндө 50дөн ашык райондү камтыган ири токой өрттөрү уланып жатат, деп кабарлайт Kazinform агенттиги Anadoluга шилтеме берип.
Мамлекеттик EFE агенттиги регионалдык бийликке таянып билдиргендей, Кастилия жана Леондо 25, Галисияда 14, Астурияда 12 жана Эстремадурада бир нече өрттүн очогу катталды.
Эң оор абал Оуренсе (Галисия), Леон жана Самора (Кастилия жана Леон), Сомьедо жаратылыш паркы (Астурия), ошондой эле Пласенсия муниципалитетинде (Эстремадура) байкалууда.
Кастилия жана Леондо болжол менен 3,2 миң адам өрттүн калктуу конуштарга жайылып кетүү коркунучунан улам үйлөрүнө кайта элек.
Галисияда болсо, өрт менен күрөшүп жатышканына бир нече күн болду, ал жерде 47 миң гектардан ашык аянт күйүп кеткен. Оуренсе районунда жүздөгөн тургундар спортзалдарда, убактылуу баш калкалоочу жайларда же туугандарынын үйүндө түнөп жатышат. Эстремадурадагы Касерес муниципалитетинде 200 адам эвакуацияланды.
Испаниянын премьер-министри Педро Санчес эң катуу жабыркаган Оуренсе жана Леон аймактарына бармакчы.
Өрттү өчүрүүгө Аскердик өзгөчө кырдаал кызматынын (UME) бөлүктөрү жана Европа Биримдиги берген учактар тартылган.
🔥 Португалиядагы абал
Ошол эле учурда Португалияда, август айынын башынан бери күчөтүлгөн режим киргизилген өлкөдө, 78 токой өртү уланууда. Алардын сегизи ири деп эсептелет.
Жарандык коргонуу кызматынын маалыматына ылайык, өрттү өчүрүүгө 5,1 миңден ашык өрт өчүрүүчү, 42 аба техникасы жана 305 жер техникалык каражаты тартылган.
Буга чейин кабарлангандай, токой өрттөрү Европанын түштүгүндө — Испанияда, Португалияда жана Грецияда да жүрүүдө. Грецияда өрт коркунучунун жогору деңгээли сакталууда.

















