Ирандын президенти Масуд Пезешкиан Россиянын президенти Владимир Путин менен телефон аркылуу сүйлөшүүсүндө Киев тарабынан уюштурулган Россия лидеринин Новгород облусундагы мамлекеттик резиденциясына жасалган дрондордун массалык чабуулун айыптады.
Бул тууралуу Кремлдин басма сөз кызматы билдирди.
“Россия Федерациясынын президенти Владимир Путин менен телефондогу сүйлөшүүнүн жүрүшүндө Иран Ислам Республикасынын президенти Масуд Пезешкиан Киев тарабынан Новгород облусунда Россия президентинин мамлекеттик резиденциясына каршы уюштурулган учкучсуз учуучу аппараттардын масштабдуу чабуулун айыптады”, — деп айтылат билдирүүдө.
Россия менен Ирандын президенттери эки өлкөнүн ортосундагы кызматташтыкты ар кыл тармактарда мындан ары чыңдоо маселелерин, ошондой эле Ирандын өзөктүк программасынын айланасындагы кырдаалды талкуулашты.
Россия лидери Иран Ислам Республикасынын жетекчилигине жана элине жакында өткөн ирандык улуттук майрам — Шабе Челле майрамынын урматына эң жакшы тилектерин жолдоду.
Өз кезегинде Пезешкиан Путинди Жаңы жыл менен жылуу куттуктады.
Белгилей кетсек, Россиянын тышкы иштер министри Сергей Лавров Киев режими 29-декабрга караган түнү Россиянын президенти Владимир Путиндин Новгород облусундагы резиденциясына 91 учкучсуз учуучу аппаратты колдонуу менен террордук чабуул жасаганын, бардык дрондор абадан коргонуу күчтөрү тарабынан жок кылынганын, жабыркагандар тууралуу маалымат жок экенин билдирген.

















