Сербиянын Белград шаарында өтүп жаткан күрөш боюнча Дүйнө чемпионатында ирандык балбандар Амирхоссейн Аббас Заре менен Амир Мирзазаде алтын медаль тагынышты.
Бул тууралуу “Mehr News” агенттиги жазды.
Маалыматка караганда, 17-сентябрда эркин күрөшүнөн 125 кг салмакта күч сынашкан Амирхоссейн Аббас Заре грузиялык Гено Петриашвилини 11:0 эсебинде утуп, дүйнөнүн эки жолку чемпиону болду. Бул балбандын дүйнө чемпионатында уткан экинчи алтын медалы. Өткөн жылы ослодо өткөн дүйнө чемпионатында да грузиялык Гено Петриашвилини 9:2 эсебинде жеңип чемпион аталган. Ал ошондой эле Токиодо өткөн Олимпиада оюндарынын коло медалынын ээси.

Эркин күрөш боюнча мелдештер 16-19-сентябрь күндөрү өттү.
Ал эми кечээ, 21-24-сентябрга чейин өтүп жаткан грек-рим күрөшүнөн 130 кг салмак ченинде күч сынашкан Амир Мирзазаде финалда түркиялык балбан Реза Каяалпты утуп, дүйнө чемпиону болду.

Ирандык балбандар бул ийгиликтери менен 2024-жылкы Париж Олимпиадасына жолдомого да ээ болушту.
Мындан сырткары бул чемпионаттын алкагында Ирандын эркин күрөш боюнча 70 кг салмактагы Амирмохаммад Яздани жана 86 кг салмактагы Хасан Яздани күмүш байгеге ээ болушту.
Ал эми грек-рим күрөшүнөн беттешкен 82 килограмм салмактагы балбан Алиреза Мехмади күмүш медалга ээ болду. Ал финалда азербайжандык Рафиг Гусейновго 1:2 эсебинде утулуп калды. Пуриа Дудмарз да жеңил салмак категориясында( 55 кг) коло медалга ээ болду.















