АКШ менен Иран эки жумалык ок атышууну токтотууга макул болушту. Анын ордуна Тегеран Ормуз кысыгын ачат. Иран Вашингтонго 10 пункттан турган сунуш берген. Трамп аны “сүйлөшүүлөр үчүн жумушчу негиз” деп эсептеген.
Ирандын Жогорку Улуттук Коопсуздук Кеңеши ок атышууну токтотууга макул болгонун ырастаганын Тышкы иштер министри Аббас Аракчи билдирди.
“Иран АКШны 10 пунктудан турган планды кабыл алдырып, улуу жеңишке жетти”, — деп айтылат Ирандын мамлекеттик телерадиокомпаниясы тараткан билдирүүдө.
Тегеран Вашингтон Ирандын талаптарынын 10 пунктунун баарына макул болгонун кошумчалады.
Ислам Республикасынын 10 пункттан турган сунушу:
Fars агенттиги маалымдагандай, маалымдар булак Иран сунуш кылган 10 пункттан турган пландын чоо-жайын түшүндүрдү. Бул план ок атышууну токтотуу боюнча макулдашуунун негизи катары кабыл алынган.
Бул план аскердик аракеттерди токтотуунун акыркы алкагын аныктайт жана негизги пункттары төмөнкүлөрдү камтыйт:
🔸 Иранга жана анын союздаш каршылык топторуна каршы ар кандай агрессияны толук токтотуу;
🔸 АКШнын аскер күчтөрүн аймактан чыгаруу, базалардан Иранга каршы ар кандай чабуулдарга тыюу салуу жана ар кандай аскердик аракеттерден баш тартуу;
🔸 Ормуз кысыгынан күн сайын чектелген сандагы кемелердин өтүшүнө эки жумага уруксат берүү — коопсуз өтүү протоколу алкагында, Ирандын көзөмөлү жана белгиленген эрежелер менен жүргүзүлөт;
🔸 Бардык негизги жана кошумча санкцияларды жоюу;
🔸 Иранга келтирилген зыяндарды компенсациялоо үчүн инвестициялык жана каржылык фонд түзүү;
🔸 Ирандын ядролук курал жасабоо боюнча милдеттенмеси;
🔸 АКШ тарабынан Ирандын уран байытуу укугун таануу жана анын деңгээли боюнча сүйлөшүүлөрдү жүргүзүү;
🔸 Ирандын өз кызыкчылыктарынын алкагында аймак өлкөлөрү менен эки тараптуу жана көп тараптуу тынчтык келишимдери боюнча сүйлөшүүгө макулдугу;
🔸 Бардык каршылык топторуна кол салбоо милдеттенмеси;
🔸 Атом энергиясы боюнча кеңештин жана БУУнун Коопсуздук Кеңешинин бардык резолюцияларын токтотуу жана бардык милдеттенмелерди БУУнун расмий резолюциясы аркылуу бекитүү.
Маалым булак белгилегендей, Иран буга чейин АКШнын 15 пункттан турган планын четке кагып, ок атышууну токтотууну өзүнүн сунуш кылган планы кабыл алынган шартта гана карай турганын айткан.













