Бүгүнкү күндө Иранда ракка каршы дары-дармектерди чыгарууда колдонулуучу чийки заттын басымдуу бөлүгү жаш адистер жана жана илимге негизделген компаниялар тарабынан өндүрүлөт.
Бул тууралуу Тегеран медициналык илимдер университетинин Фармацевтика факультетинин деканы Мохсен Амини билдирип, фармацевтика тармагынын өнүгүшүндө университеттик билим берүүнүн ролун баса белгиледи.
Амини “Fars News” агенттигине берген маегинде фармацевтикадагы жетишкендиктер — бул коллективдүү эмгектин жыйынтыгы экенин белгиледи.
“Эң маанилүү жетишкендиктердин бири — бул жаңы жана заманбап дары-дармектерди өндүрүү. Бул препараттарды дүйнөдөгү ири фармацевтикалык компаниялар иштеп чыгып, алар аз убакыттын ичинде Иранда да чыгарылып баштайт”, – деди ал.
Анын айтымында, мындай ийгиликтер фармацевтика факультеттеринин студенттери менен бүтүрүүчүлөрүнө берилген сапаттуу билимдин жана алардын бул билимди ички өнөр жайда колдоно билгендигинин натыйжасы болуп саналат.
Амини белгилегендей, Иранда өндүрүлгөн дары-дармектер импорттук аналогдорго салыштырмалуу кыйла арзан.
“Бүгүнкү күндө ирандык дары-дармектер чет элдик аналогдорго караганда кыйла арзан. Ошондуктан чет өлкөдө жашаган ирандыктар мекенине келип-кеткенде бул жерден дарыны көп өлчөмдө алып кетишет”, – деп билдирди ал.
Ал кошумчалагандай, ата мекендик дары-дармек өндүрүшү бул университеттердеги билим берүү программаларынын түздөн-түз жыйынтыгы.
Амини илимге негизделген компаниялар тууралуу айтып жатып, көптөгөн бүтүрүүчүлөр окууну аяктагандан кийин өз алдынча же биргелешип мындай компанияларды түзүшөрүн, инновациялык идеяларын лабораториялык деңгээлден тартып өндүрүшкө чейин жеткирип, рынокко алып чыга алышарын белгиледи.
Анын айтымында, фармацевтика өнөр жайы эки негизги багытты камтыйт — даяр дары формаларын чыгаруу (ампулалар, сироптор, мурунга арналган спрейлер ж.б.) жана активдүү фармацевтикалык заттарды синтездөө.
“Азыркы учурда Иранда 400дөн ашуун дарынын чийки заты өндүрүлөт. Анын көбү — баасы жогору болгон ракка каршы препараттар. Айрымдары химиялык ыкма менен, айрымдары биотехнологиялардын жардамы менен, ал эми кээ бирлери нанотехнологиялардын негизинде жасалат”, — деп түшүндүрдү Амини.
Ал бул жетишкендиктердин бардыгы илимге негизделген компанияларда эмгектенген жаш ирандык фармацевттердин билимин өркүндөтүп, өндүрүштү өнөр жай деңгээлине чейин жеткирген аракети менен байланыштуу экенин баса белгиледи.

















