Бир дагы ислам өлкөсү АКШнын президенти Дональд Трамптын Газа тилкеси боюнча планын колдобойт жана бүткүл ислам дүйнөсү ага караманча каршы.
Бул тууралуу Ирандын Тышкы иштер министрлигинин басма сөз катчысы Исмаил Багаи билдирди.
Күн мурун Палестинанын ФАТХ революциялык кеңешинин мүчөсү Кифах Харб Каирде өткөн Араб лигасынын саммитинин катышуучулары палестиналыктарды көчүрүү пландарына каршы чыгуу жоопкерчилигин өзүнө алышканын билдирген.
“Биз бул планды кыйыр түрдө да колдогон бир дагы ислам өлкөсүн билбейбиз. Ислам дүйнөсү бул планга караманча каршы. Бактыга жараша, аймактын ислам өлкөлөрү ага жана анын коркунучуна көңүл буруп жатышат”, – деди Багаи.
4-мартта Египеттин борбору Каирде Палестина маселеси боюнча Араб Лигасынын чукул саммити өттү. Анын жыйынтыгы боюнча катышуучулар Газа тилкесин кайра куруу боюнча Египет тарабынан иштелип чыккан планды жактырышты, анда Палестина элинин өз жерлеринде болушун сактап калуу каралган.
Ошондой эле уюмдун чукул саммитинин жыйынтыктоочу декларациясында Араб мамлекеттеринин лигасына мүчө өлкөлөр палестиналыктарды өз аймактарынан мажбурлап көчүрүү боюнча ар кандай аракеттерге жол берилбестигин ырасташты.
Саммит Газадагы ок атышууну токтотуу келишиминин биринчи этабын белгилеген 42 күндүк ок атышпоонун мөөнөтү аяктап, АКШнын президенти Дональд Трамп Газа тилкесин «көзөмөлгө алаарын» айткан учурга туш келди.
Трамп АКШ Газа тилкесин “көзөмөлгө аларын” жана аймактагы реконструкция иштерине, ошондой эле аны бүткүл дүйнө үчүн “Жакынкы Чыгыш ривьерасына” айландырууга жооптуу болорун айткан. Ал ошондой эле АКШ өз армиясын Газага жөнөтө аларын четке какпай, тилкеге жеке өзү барарын убада кылган.
Америка лидеринин идеясына араб өлкөлөрү, Иран жана кээ бир Батыш мамлекеттери да каршы чыгышты.















