Тегеран АКШнын Венесуэлага карата жасаган аракеттерин айыптады.
Бул тууралуу Ирандын Тышкы иштер министрлиги билдирди.
«Иран ТИМи АКШнын Венесуэлага каршы жасаган аскердик чабуулун, ошондой эле бул өлкөнүн аймактык бүтүндүгүнүн жана эгемендүүлүгунүн орой түрдө бузулушун чечкиндүү түрдө айыптайт», — деп айтылат билдирүүдө.
Ведомство ошондой эле Каракастын өзүн коргоо укугу бар экенин белгилеп, бардык мамлекеттердин, БУУнун жана БУУнун Коопсуздук кеңешинин АКШнын Венесуэлага карата аракеттерин тез арада токтотуу үчүн жоопкерчилиги бар экенин билдирди.
3-январга караган түнү Венесуэланын борбору Каракаста жардыруулар болгон. Кийинчерээк Трамп АКШ кеңири масштабдагы соккуларды урганын, ал эми Мадуро жубайы менен кошо кармалып, өлкөдөн чыгарылганын билдирди.
Жабыркаган объектилердин арасында аскердик база, башкы порт жана газ өткөрүү инфраструктурасы бар. Алдын ала баалоо боюнча, чабуулдар мунай объектилерине тийген эмес.
Венесуэланын бийлиги АКШнын бул чабуулунун максаты өлкөнүн мунайын жана минералдык ресурстарын көзөмөлгө алуу болгонун билдирди.
Республиканын Тышкы иштер министрлиги БУУнун Коопсуздук кеңешинин шашылыш жыйынын өткөрүүнү талап кылып, башка эл аралык уюмдарга да кайрылууну көздөп жатат. Тышкы саясат ведомствосунун башчысы Иван Хиль Пинтонун айтымында, бул чабуулдун кесепетинен жай тургундар жана аскер кызматкерлери арасында курмандыктар болду.















