Ирандын Ислам революциясынын сакчылар корпусу алыскы аралыкка учуп, 50 килограммдык дүрмөт менен жабдылган жогорку тактыктагы “жанкечти” (камикадзе) учкучсуз учуучу учагынын сыноосун ийгиликтүү өткөрдү.
Бул тууралуу Tasnim News агенттиги жазды.
Сакчылар корпусунун кургактагы күчтөрүнүн изилдөө жана өзүн-өзү камсыздоо боюнча уюмдун жетекчиси генерал Али Кухестани жаңы дрон Ирандын жаш адистери тарабынан иштелип чыккан жана чыгарылган камикадзе дрондорунун серияларынын бири экенин билдирди.
Анын айтымында, дрон «Мераж-532» деп аталып, поршень кыймылдаткычы менен жабдылган, анын бир тараптуу учуу аралыгы 450 чакырым. Учкучсуз учак 50 килограммдык дүрмөт менен жабдылган. Дрон каалаган буталарды жогорку тактык менен атууга жөндөмдүү.
“Бул дрон 12 миң фут (болжол менен 3,6 миң метр) бийиктикте 3 саат бою учуп жүрө алат. Аны каалаган унаадан учурса болот”, – деп билдирди Кухестани.

Ал Ислам революциясынын сакчылар корпусунун кургактагы күчтөрүнүн изилдөө жана өзүн-өзү камсыздоо боюнча уюмунда учкучсуз учуучу учактар тармагын өнүктүрүү процесси жакшы ылдамдыкта жүрүп жатканын айтып, жакынкы келечекте бул дрондун катарына башка сокку уруучу, машыгуучу жана жанкечти дрондор кошуларын билдирди.
Эске салсак, Ирандын Куралдуу күчтөрү өткөн жылдын октябрь айында дагы “Meraj-521” деп аталган “жанкечти” дронун көрсөткөн. Жеңил класстагы бул учкучсуз аппарат бутага жетип урунганда жарылып кетет.
Дрон 5 чакырым радиуска 15 мүнөткө чейин учуп жүрө алат. Оператор аны атайын планшеттин жардамы менен бутага багыттай алат.
Дрондун өзгөчөлүгү – ал компакттуу жана жеңил болгондуктан аны бүктөлгөн абалда рюкзакка салып жүрүүгө болот. Ал 1 кг чейин согуштук дүрмөттү алып жүрө алат.

















