Ирак кору болжол менен 8,8 миллиард баррель жеңил чийки мунайга барабар болгон жаңы ири мунай кенин ачты. Өлкө далилденген кор боюнча дүйнөдө бешинчи орунда туруп, бул болжол менен 145 миллиард баррелге барабар. Бул дүйнөлүк жалпы мунай корунун болжол менен 8%га жана Жакынкы Чыгыштагы мунай корунун 17%ын түзөт.
Бул маалымат Ирактын мунай министри Хаян Абдул Гани менен кытайлык ZhenHua Oil компаниясынын өкүлдөрүнүн ортосундагы расмий жолугушууда белгилүү болгонун Euronews агенттиги жазды.
“Бул мунай кору Ирактын энергетика тармагындагы акыркы мезгилдеги эң маанилүү ачылыштардын бири деп эсептелет, анткени баштапкы эсептөөлөр чалгындоо блокторунун биринде 8,8 миллиард баррелден ашык чийки мунайдын ири запастары бар экенин көрсөтүп турат”,- деп жазды агенттик.
Qurnain блогу Ирактын түштүк-батышындагы Нажаф провинциясында, Багдаддан болжол менен 180 чакырым алыстыкта, Ирак-Сауд чек арасында жайгашкан. Ал мунай чалгындоо үчүн эң келечектүү аймактардын бири болуп саналат, анын аянты 8773 чарчы километрди түзөт. Ал жердеги мунай иштетүү, чалгындоо жана өндүрүү боюнча келишимге 2024-жылдын 17-октябрында кол коюлган.
Министрликтин маалыматы боюнча, Shams-11 чалгындоо скважинасындагы бургулоо иштеринин натыйжасында күнүнө 3248 баррель баштапкы өндүрүш көлөмү менен жеңил мунай бар экени аныкталган.
ZhenHua өзүнүн туунду компаниясы Qurnain Petroleum Limited аркылуу Ирак тарап менен өнөктөштүктө чалгындоо, бургулоо жана сейсмикалык изилдөөлөр боюнча негизги оператор болуп саналат.
Белгиленгендей, Багдад өлкөнүн түштүгүндөгү Басра провинциясын Сириянын чек арасына жакын жайгашкан Анбар провинциясындагы Хадита шаары менен байланыштырган ири мунай куурун куруу боюнча стратегиялык долбоорду тездетүү үстүндө иштеп жатат, анын экспорттук кубаттуулугу күнүнө 2,5 миллион баррелди түзөт.



















