Индия дагы бир жолу Трамптын администрациясын Иран же Венесуэла мунайын сатып алууга уруксат берүүгө чакырып, орусиялык мунайга болгон көз карандылыкты азайтуу мүмкүн болоруна, бирок бул Вашингтон чектөөлөрдү жеңилдеткенде гана ишке ашарын эскертти.
Bloomberg агенттиги сүйлөшүүлөрдүн жүрүшү менен тааныш булакка шилтеме берип жазгандай, ушул жумада АКШга келген индиялык делегация америкалык аткаминерлер менен жолугушуу маалында өз өтүнүчүн кайрадан айткан.
Индиянын өкүлдөрү белгилешкендей, Россия, Иран жана Венесуэла сыяктуу ири өндүрүүчү өлкөлөрдөн мунай импортун кыскартуу дүйнөлүк энергия бааларынын өсүшүнө алып келиши мүмкүн.
Бул сапар Вашингтон Индияга орусиялык мунай импорттоо үчүн жогорку бажы төлөмдөрүн киргизүү чечимин кабыл алгандан кийин болду. Бул төлөмдөргө карабастан, Нью-Дели дагы деле арзандатылган баадагы орусиялык мунайды сатып алып келет жана ал өлкө үчүн эң маанилүү энергия булагы бойдон калууда.
Индиянын соода министри Пиюш Гоял ушул жуманын башында Нью-Йорктогу сөзүндө өлкө америкалык мунай жана газ сатып алууну көбөйтүүгө умтуларын билдирди.
Индиянын мунай керектөөсүнүн дээрлик 90%ы импорт аркылуу камсыздалат, ал эми арзандатылган орусиялык мунай өлкөнүн импорттук чыгымдарын бир кыйла кыскартат.
Индия 2019-жылы Ирандан мунай сатып алууну токтоткон. Reliance Industries — өлкөдөгү эң ири жеке мунай кайра иштетүүчү завод да АКШ санкциялары күчөгөн шартта быйыл Венесуэладан мунай сатып алууну токтотту. Индиянын мунайды кайра иштетүүчү заводдору (МКЗ) Жакынкы Чыгыштан көбүрөөк мунай ала алышмак, бирок аткаминерлер мунун жалпы чыгымдарды көбөйтөрүн эскертишти.
Индия Соода министрлигинин маалыматына ылайык, июль айында МКЗлар орусиялык мунайдын бир баррелине орто эсеп менен 68,90 доллар төлөшкөн. Бул саудиялык мунайга 77,50 доллар жана америкалык мунайга 74,20 доллар менен салыштырганда бир кыйла арзан. Индия деңиз жолу менен жеткирилген орусиялык мунайдын эң ири сатып алуучусу болуп эсептелет, ал эми Кытай түтүк аркылуу келген мунайды кошкондо эң ири импорттоочу бойдон калууда.

















