Америкалык ишкер жана X социалдык тармагынын ээси, дүйнөнүн эң бай адамы Илон Маск Норвегиянын Norges Bank Investment Management мунай фондунун жетекчиси Николай Танген менен кечки тамакка келүүдөн баш тартты, анткени Ослого жетүү ал үчүн өтө кымбат болгон имиш.
Бул тууралуу норвегиялык E24 гезити жазды.
Басылмага Танген менен Масктын кат алышуусу түшүп калган. Норвегиялык америкалык миллиардерди 2025-жылдын 28-апрелине пландаштырылган Ослодогу бизнес кечки тамакка алдын ала чакырган. Ага Ferrari, Novo Nordisk, Nestle, DoorDash, Adidas жана башка компаниялардын жетекчилери да катышары күтүлүүдө.
Маск адегенде бул чакырууну кабыл алып, бул “сонун угулат” деп жооп берген, бирок кийинчерээк ал коноктордун тизмесине кирбей турганы белгилүү болгон.
Мунай фондунун коммуникациялар боюнча директору Марте Скор гезитке “Ал ага бул иш чарага катышуу кыйын жана кымбат болорун айтты”,- деди.
Басылма жайында Танген менен Масктын мамилеси начарлап кеткенин да эске салган.



















