Бул аралыкта ал Россиянын ар кайсы шаарларында жашырынып, улам жүргөн жерин алмаштырып турган.
“Ош” аэропортунан адам өлтүрүүгө шектелип издөөдө жүргөн киши кармалды. Бул тууралуу Ош ШИИБ билдирди.
Маалыматка ылайык, Ош шаарынын 37 жаштагы тургуну Дж.М. 14 жыл Россиянын ар кайсы шаарларында жашырынып жүрүп, 26-апрелде колго түшүрүлгөн.
“Шектүү Дж.М. Оштогу июнь окуяларында, 2010-жылы 13-июнда, Кара-Суу районунун 1953-жылы туулган тургунун шериктери (кармалышкан) менен Ак-Буура дарыясынын жээгине алып барышкан. Ал жерден жаранды мыкаачылык менен өлтүрүп, дарыяга ыргытып жиберишкен. Маркумдун сөөгү 2010-жылы 19-июнда Өзбекстандын аймагынан табылган. Кийин абал турукташып, кылмышка шектүүлөр аныктала баштаган учурда Дж.М. из жашырган”, — деп айтылат маалыматта.
Шектүү убактылуу кармоочу жайга киргизилип, тергөө уланып жатканы кошумчаланды.
Белгилей кетүүчү жагдай, 2010-жылы 7-апрелде Кыргызстанда элдик революция болгон учурда өлкөбүздүн түштүк борборунда айрым сепаратисттик топтор улуттар аралык жаңжал чыгарышып, анын кесепетинен 500гө жакын адамдын өмүрү кыйылган жана 40ка жакыны дайынсыз жоголуп, алардын дареги бүгүнкү күнгө чейин белгисиз бойдон кала берүүдө. Мындан тышкары жеке адамдар менен мамлекетке 3 млрд сомго жакын зыян келтирилген.



















