Бүгүн, 9-апрелде ыйык Рамазан айы бүтүп, эртең Орозо айт. Бирок жыл сайын миңдеген мусулмандардын катышуусунда быйыл Айт намазы борбордук эски Ала-Тоо аянтында окулбайт.
Башкача айтканда, Айт намазы мечиттерде окулмакчы. Сыягы, мындай чечим коопсуздук жагдайынан улам кабыл алынса керек. Бирок коомчулукта ар кандай пикирлер айтылууда. Деги Айт намаздын борбордук аянтта окулбай калышы туурабы жана мечиттерде окулган намаз кабыл алынабы? Бул боюнча дин адиси Хамидулла Садиллаев өзүнүн Фейсбук баракчасында төмөндөгүдөй пикирин жазган:
“Рамазан айынын башталышы менен бүтүшүн аныктоодо жаңырган айды эч кандай астрономиялык аспаптарды колдонбостон көз менен көрүүчү мусулман өлкөлөрү менен чогуу болсо Муфтият утушка жетет деп сүйүнүп жүрсөм, көрсө айт намазын аянтта окуш керекпи же мечитте да окуса болобу деген маселе да бар экен да.
Кыскасы, арабызда кээ бир адамдар бар, алардын кылаар иши бул жөн гана ызы-чуу чыгарып, коомчулукта резонанс жаратуу.
Мындай адамдарды илгери кыргыз эли:
“Атың чыкпаса жер өрттө” – деп койчу эле.
Айтайын дегеним, Айт намазын аянтта окуу парз да, важиб да эмес. Мечиттин сыртындагы короосунда же үстү ачык ээн жерде окуса да сүннөт амал кылган болуп эсептелет.
Илгери мурдагы Муфтийибиз Максат ажынын учурунда атың өчкүр Корона вирус таркап, мечиттерди убактылуу жабуу зарылчылыгы туулганда бейнамаз адамдарда Муфтиятка каршы чыгып, мечиттерди ачкыла деп ызы-чуу кылышкан эле.
Бир аалымдан мечиттин жамааты Таравих намазын 2 рекеттен окуйбузбу же 4 рекеттен окуйбузбу деп экиге бөлүнүп, ызы-чуу кылып жатышат, кандай кылабыз деп сурашканда:
“Мечитти жаап койгула, Таравих окубай эле коюшсун”,- деген экен.
Эмнеге? – дешсе,
Таравих намазы бул сүннөт амал, ал эми мусулмандардын ынтымагы бул парз деген экен.
Ошондуктан ушул учурдан пайдаланып, жалпы мусулман бир туугандарымды жергиликтүү диний башкармалыкты угуп, алардын чечимдерине баш ийүүнү үйрөнүп, башчыларга сый – урмат көрсөткөндү үйрөнсөк дейм.
Чет өлкөдө жашаган аалымдар деле өздөрү жашаган мамлекеттин расмий дин башкармалыгынын чечимдерине каршы иш алып барышпайт жана шакирттерин деле андай кылууга чакырбайт.
Ошондуктан, келиңиздер, дин эркиндиги, сөз эркиндиги деген баа жеткис ниматтарга шүгүр келтирип, ушул эки чоң ниматтын кадыр-баркына жетели”.


















