Түркмөнстан парламентинин Жогорку палатасынын төрагасы Гурбангулы Бердымухамедов иш сапары менен Иран Ислам Республикасына барды. Бул тууралуу Түркмөнстандын Мамлекеттик маалымат агенттиги билдирди.
Аны Тегерандын эл аралык аэропортунан Ислам Республикасынын расмий өкүлдөрү жана түркмөн делегациясынын мүчөлөрү тосуп алышты.
Бул жерде Бердымухамедов Ирандын Жол жана шаар куруу боюнча министри Мехрдад Барзпаш менен сүйлөшүү өткөрдү.
“Баарлашуунун жүрүшүндө Гурбангулы Бердымухамедов Түркмөнстандын туруктуу бейтараптык статусуна негизделген тышкы саясий курсту ырааттуу ишке ашыруу менен коңшу мамлекеттер, анын ичинде Иран Ислам Республикасы менен натыйжалуу кызматташтыкты өнүктүрүүгө чоң көңүл бурулуп жатканын белгиледи”, – деп айтылат маалыматта.
Мындан тышкары, алдыдагы сүйлөшүүлөрдүн жүрүшүндө өз ара пайдалуу мамилелердин негизги багыттарын мындан ары активдештирүү үчүн зарыл болгон күч-аракеттер жумшала тургандыгы баса белгиленип, өз ара достуктун жана жакшы коңшулаштыктын принциптерине негизделген түркмөн-иран кызматташтыгы мындан ары да ийгиликтүү өнүгүүсүнө ишеним билдирилди.
Жогорку даражалуу саясий жана экономикалык делегациянын башындагы Бердымухамедов Ирандын президенти Ибрахим Раиси жана руханий лидери Аятолла Али Хаменеи менен жолугушары күтүлүүдө.
Тараптар жолугушуунун жыйынтыгы боюнча маалымат жыйынында да сөз сүйлөшөт.
Мындан тышкары, түркмөн элинин улуттук лидери Иран парламентинин жана максатка ылайыктуулук боюнча кеңештин төрагасы менен жолугушууну пландаштырууда.
Белгилей кетсек, Түркмөнстандын президенти Сердар Бердымухамедов Тегеранга расмий сапар менен былтыр барган.

















