АКШнын президенти Дональд Трамптын администрациясы менен Гарвард университетинин ортосундагы келишпестик уланууда.
Бүтүрүүчүлөрдүн жакындары АКШ бийлигинин окуу жайга жасаган кысымын айыптап, салтанаттын катышуучулары эл аралык студенттерди чектөө жана каржылоону кыскартуу билимдин жана эркиндиктин пайдубалын бузарын айтышты. Ошондой эле университеттерди каржылык колдоодон ажыратуу менен коркутуу жана Палестинаны колдоо боюнча нааразылык акцияларына тыюу салуу сыяктуу саясаттарына каршы чыгышты.
Бул тууралуу Anadolu агенттиги жазды.
Нааразылык акциясына катышкан француз жараны өкмөттүн университетке жасаган саясий кысымын “акылсыздык” деп атап, тынчсыздануусун билдирди.
“Биз буга толугу менен каршыбыз. Бул өзүн-өзү жок кылуунун жолу. Эгер билимге кол салсаң, бюджетти, саламаттыкты сактоону кыскартсаң өлкө жок болот”, – деди ал.
Гарварддагы чет элдик студенттердин үлүшүн 15 пайызга чейин чектөө талабына комментарий берип жатып, Палестинаны колдогон демонстрацияларга катышуу адамды антисемит кылбайт деген пикирин кошумчалады.
“Бул ишеним жөнүндө эмес, саясат жөнүндө. Газада болуп жаткандар чатак жана геноцид. Бул иудаизм эмес, бул Нетаньяхунун саясаты”, – деди.
Ал Газага кол салууларды токтотуу боюнча эл аралык аракеттер натыйжасыз болгонун кошумчалап, болуп жаткан окуяларды “цивилизациянын акыры” деп атады.
Гарвардда иштеген түрк изилдөөчүсү жумушунан ажырап калуу коркунучуна карабай республикалык администрациянын чектөө чараларын сынга алууну улантып жатканын айтты.
“Мен бир нече бөлүмдөрдө, анын ичинде Гарвард медициналык мектебинде сабак берем. Учурда дүйнөдө болуп жаткан эң коркунучтуу нерсе – Палестинада массалык адам өлтүрүү”, – деди изилдөөчү.
Окумуштуу Америка Кошмо Штаттары эркиндик принциптерине негизделгенин эске салып, америкалыктар да бул зомбулуктун уланышын каалабай тургандыгын кошумчалады.
Болуп жаткан кырдаалга байланыштуу студенттер менен мугалимдер комментарий берүүдөн баш тартышса, айрымдары атын атабоону суранышкан.
Университеттеги кырдаалга “Новая газета” басылмасы да байкоо жүргүзүп, билим алып жаткан студенттер менен сүйлөшкөн.
Орусиялык студент Мария Кузнецова университет Кошмо Штаттардагы эң эски жана абройлуу университеттердин бири экендигин, анын бүтүрүүчүлөрүнүн арасында ондогон мамлекет башчылары, жүздөгөн саясатчылар жана эки жүзгө жакын миллиардерлер бар экендигин билдирген.
Анын айтымында, азыр да мамлекет башчылардын, премьер-министрлердин жана дүйнөгө белгилүү адамдардын балдары билим алып жатышат.

Чет элдик студенттерсиз Гарвард “Гарвард болбой” калышы мүмкүн
22-майда АКШнын Ички коопсуздук министрлиги Гарвардды эл аралык студенттерди кабыл алуу укугунан ажыраткан.
Трамптын администрациясы Гарвард университетине чет элдик студенттерди кабыл алууга жана окутууга “тиешелүү мыйзамдарга туура келбейт” деген жүйө менен тыюу салып, АКШнын ички коопсуздук министри Кристи Ноэмдин көрсөтмөсү боюнча студент алмашуу программасынын аккредитациясы жокко чыккан.
Эми Гарварддагы бардык чет элдиктер – 140 өлкөдөн 6800дөй студент башка окуу жайларга которулушу же өлкөдөн чыгып кетиши керек.
Кошмо Штаттардагы абройлуу университеттердин бири деп эсептелген Гарвард бул айыптоолор жана чектөөлөр менен макул эместигин билдирип, бийликтин аракеттерин “саясий кысым” деп атоодо.
“Өкмөттүн иш-аракеттери мыйзамсыз. Биз Гарварддын 140тан ашык өлкөдөн келген студенттерин жана окумуштууларды тосуп алуу мүмкүнчүлүгүн сактап калууга чечкиндүүбүз”, – деп айтылат Гарварддын билдирүүсүндө.
“Джон Кеннеди” университетинин студенттеринин 59%ы чет өлкөдөн келген. “Т.Х.Чан” атындагы коомдук саламаттыкты сактоо окуу жайында 40%, ал эми Гарвардда 35% чет элдик студенттер билим алышууда.
23-майда Гарварддын администраторлору Массачусетс штатынын федералдык сотуна доо арыз менен кайрылышып, бул тыюу Конституцияны бузат жана академиялык эркиндикке коркунуч келтирээрин айтышкан.
“Эл аралык студенттерсиз Гарвард “Гарвард” болбой калат” деп айтылат доо арызда.
Эртеси күнү АКШнын округдук судьясы Эллисон Берроуз иш каралып жатканда Трамптын администрациясынын чечимине бөгөт коюп, соттук отурумдарды 27- 29-майга белгилеген.
Сот Гарвардга чет элдик студенттерди кабыл алууга уруксат берди деп жазды DW.com агенттиги.
Билдирүүгө караганда, судья Эллисон Берроуз Трамптын эл аралык студенттердин университеттин окуусуна тыюу салуу чечимине бөгөт койгон. Бирок бул иш боюнча акыркы чечим чыга элек.
Берроуз мурдагы президент Барак Обама тарабынан дайындалган судья.
Ал мындай чечим “статус-квону сактап калууга” жардам бере тургандыгын белгиледи.
Ал эми Гарвард Трамптын администрациясын сотко берди.
Эскерте кетсек, АКШнын ички коопсуздук министри Кристи Ноем Гарвард университетин “зордук-зомбулукка, антисемитизмге үндөгөн” деп айыптаган.















