Өтүп бараткан сезондун жыйынтыгы менен Кыргызстандын футбол тармагынын мыктыларды аныкталып, жетишкендиктер үчүн жыл сайын өтүүчү, индивидуалдуу сыйлыктарды тапшыруу аземи өттү. Анда төмөндөгү номинациядар боюнча сыйлыктар тапшырылды:
Мыкты оюнчу – Кайрат Жыргалбек уулу;
Профессионалдык футбол лигасынын мыкты оюнчусу – Данин Талович;
Кыз-келиндер футболунун мыкты оюнчусу – Кенжебубу Ырысбек кызы;
Футзалдын мыкты оюнчусу – Максат Алимов;
Футболдун мыкты жаш оюнчусу – Султан Чомоев;
Футболдун мыкты машыктыруучусу – Урмат Абдукаимов;
Футзалдын мыкты машыктыруучусу – Канимет Аралбаев;
Футболдун мыкты калысы – Урмат Баялиев;
Футзалдын мыкты калысы – Чынгыз Мустафаев;
Мыкты спорттук уюм – Кыргыз Профессионалдык футбол лигасы;
Мыкты регионалдык ассоциация – Ош шаарынын футбол ассоциациясы;
Мыкты футбол клубу – «Абдыш-Ата».
«Кыргыз футболунун сыймыгы» сыйлыктарына ФИФА калысы Вероника Бернацкая жана ФИФА калыс жардамчысы Рамина Цой ээ болушту.
Эске салсак, алдыда Кыргызстандын Улуттук курама командасы үчүн чоң сыноолор турат.
Биринчиси – 2024-жылдын 12-январында Катарда баштала турган Азия кубогу. Бул оюндарга бир айдан азыраак убакыт калды. Анда “Ак шумкарлар” F тайпасында Сауд Арабиясы, Тайланд, Оман курама командалары менен беттешет.
Ал эми 2026-жылы өтө турган дүйнө чемпионаты үчүн да сыноолор турат. Кыргызстан D тайпасында Кытай Тайбэйи, Малайзия жана Оман курамалары менен ойнойт. Дүйнө чемпионаты 2026-жылы АКШнын, Мексиканын жана Канаданын 16 шаарларында өтөт жана ага биринчи жолу 48 курама команда катышат.
Ошондуктан кыргызстандык футболчулар мыкты көрсөткүчкө жетишсе, бул мундиалга жолдомо алып калышы да толук мүмкүн. Анткени Азия континентинен сегиз команда дүйнө чемпионатына жолдомо алат. Тандоо оюндары беш этаптан турат. Кыргызстан курама командасы экинчи этаптан мелдешке катышып жатат. Мында 36 курама команда 9 тайпага бөлүнүп ойнойт. Оюндардын жыйынтыгында тайпада биринчи жана экинчи орунду ээлеген 18 команда кийинки баскычка жана 2027-жылы өтө турган Азия Кубогуна жолдомо алат.
Мындан сырткары, Кыргызстандын футзал боюнча Улуттук курамасынын алдында да чоң сыноо турат. Ал кийинки жылы өтө турган Азия Кубогу. Анда “Ак шумкарлар” «С» тайпасында Жапония, Тажикстан жана Түштүк Корея курамалары менен беттеше турган болууда. Бул оюндар 2024-жылы 17-28 апрель күндөрү Таиландда өтөт.
Сүрөт: Кыргыз футбол союзу
