Бүгүн, 11-июнда, Улуттук курама 2026-жылкы Дүйнө Чемпионаты жана 2027-жылкы Азия Кубогунун тандап алуу оюндарынын экинчи раундунун жыйынтыктоочу (бешинчи) турунун алкагында Оманга каршы беттеш өткөрөт. Конокто оюн өткөрө турган “ак шумкарлар” ак түстөгү футболкалар менен чыгышат.
Оюн алдында Улуттук кураманын башкы машыктыруучусу Штефан Таркович, Оман менен акыркы жылы төртүнчү оюн өткөрүп жатканын айтып, командалар бири-бирин жетиштүү деңгээлде изилдеп алганын белгиледи.
“Бул оюндарда бизде нейтралдуу статистикаларды: бир жеңиш, бир тең чыгуу, бир жеңилүүнү эске салсак болот. Мен алдыда эки бирдей күчтүү команданын ат салышкан абдан татаал оюнун күтөм. Кийинки турга өтүү үчүн күрөшкө келдик, тапшырманы аткарып, кыялыбызды орундатууга даярбыз. Биз үчүн эң негизги маселе – кийинки этапка өтүү. Буга жетишүү үчүн бардык күчүбүздү жумшайбыз!»,-деди ал.
Беттешке австралиялык ФИФА калысы Алиреза Фаганинин командасы калыстык кылат. Каптал сызыктарда анын мекендештери Антон Щетинин жана Эшли Бихем жардам беришсе, Бижан Айдари (Иран) оюндун резервдик калысы болот.
Бүгүнкү беттеш Омандын Маскат шаарынын «Султан Кабус» спорт комплексинде кечки саат 22:00 старт алат. Оюнду УТРК Спорт каналы түз эфирде көрсөтөт.
Беш турдук оюндардын жыйынтыгы боюнча Улуттук курама он упай менен тайпанын турнирдик жадыбалында 2-орунду ээледи. Оман он эки упай менен 1-орунда, Малайзия (7 упай) – 3-орунда, Кытайлык Тайбэй (0 упай) – акыркы орунда. Командалардын упайлары тең чыккан учурда, орундар курамалардын гол айырмачылыгы менен бөлүштүрүлөт.
Аталган квалификациялык оюндары үчүн чүчүкулактын жыйынтыгында 4 командадан турган 9 тайпа түзүлгөн. Кыргызстандын курамасы Оман, Малайзия жана Кытайлык Тайбэй курамалары менен кошо «D» тайпасында жайгашкан. Квалификациянын экинчи раундунун жыйынтыгында ар бир тайпадан эң мыкты эки курама 2027-жылкы Азия Кубогуна жолдомо алып, 2026-жылкы Дүйнө Чемпионатына болгон жолдомого күрөшүн улантат.



















