Француз Voltalia компаниясы Өзбекстандын Бухара облусунда кайра жаралуучу энергия булактары тармагында 1 миллиард долларлык эки долбоорду ишке ашырууну пландап жатканын компаниянын вице-президенти Йони Аммар O’zbekiston 24 телеканалына берген маегинде билдирди, деп жазат Spot.uz.
Voltalia компаниясынын өкүлү белгилегендей, компания Өзбекстанда мындан бир жарым жыл мурун, Хорезм облусунда 100 МВт кубаттуулуктагы күн электр станциясын куруу боюнча тендерди утуп алгандан кийин иштей баштаган. Март айында курулушу башталган станциянын жалпы баасы 400 миллион долларды түзгөн.

«Биздин максат – 1 ГВт кубаттуулукту киргизүү, $1 млрд долбоорлорду ишке ашыруу пландалып жатат, учурда 35 туруктуу жумушчу орун түзүлдү. Биздин иш-чаралар масштабдуу болгон сайын жаңы вакансиялардын саны да көбөйөт», – деди Йони Аммар.
Презентацияда айтылгандай, долбоорлордун бири Гиждуван аймагында гибриддик электр станциясынын курулушу. Станциянын баасы жана кубаттуулугу тиешелүүлүгүнө жараша 400 миллион долларды жана 400 МВтты түзөт. Экинчи энергетикалык долбоор 650 миллион долларга бааланган.
Voltalia 2022-жылдын аягында Хорезмде күн электр станциясын куруу боюнча тендерди утуп алган. Француз компаниясы долбоорду ишке ашыруу үчүн Европа реконструкциялоо жана өнүктүрүү банкынан 34 миллион доллар насыя алууну пландаган.
Кошумчалай кетсек, франциялык компания Навои облусунда кубаттуулугу 400 МВт болгон гибриддик электр станциясын жана энергияны сактоо системасын куруу боюнча алдын ала келишим түздү. Voltalia ошондой эле 2023-жылдын ноябрында долбоорлор боюнча өкмөт менен келишим түзгөн.
Май айында Voltalia Хорезм облусунда 500 МВт аккумулятордук системаны кура ала турганы белгилүү болгон. Комплекс курулуп жаткан фотоэлектр станциясынан энергия чогултуу үчүн колдонулушу керек.


















