Грузиянын Евробиримдикке кошулуу процесси токтотулганын ЕБдин Тбилисидеги элчиси Павел Герчинский билдиргенин РИА Новости агенттиги жазды.
«Азыркы Грузия бийлигинин ниети Евробиримдиктин лидерлери үчүн түшүнүксүз. Тышкы таасирдин ачыктыгы тууралуу мыйзам артка кеткен кадам экени анык. Ошондой эле антибатыштык, антиевропалык риторика Европа Биримдигине кирүү боюнча жарыяланган максатка таптакыр туура келбейт. Тилекке каршы, учурда Грузиянын Евробиримдикке кошулуусу убактылуу токтотулду», – деди ал.
Ошол эле учурда Евробиримдиктин өкүлү мындай окуяларды өкүнүчтүү деп атады.
Герчинский кошумчалагандай, ал октябрь айындагы парламенттик шайлоодон кийин Грузиянын жаңы өкмөтү, кандай гана болбосун, Евробиримдикке интеграциялоо багытында кайрадан «олуттуу ишти» баштайт деп үмүттөнөт.
Закавказье республикасында парламенттик шайлоо 26-октябрда өтөт.
Эске салсак, Грузияда чет элдик агенттер боюнча чуулгандуу мыйзам июнь айында кабыл алынып, күчүнө кирген.
Мыйзам тууралуу
Грузияда “Чет элдик таасирдин ачыктыгы жөнүндө” мыйзам долбоорун кабыл алуу маселеси биринчи жолу 2023-жылдын башында көтөрүлгөн. Февраль айында парламентте катталып, мартта биринчи окууда кабыл алынган. Андан улам өлкөнүн борбору Тбилисиде массалык митингдер башталып, кийинчерээк бийлик документти кайра чакыртып алган.
Бийликтеги “Грузин кыялы” партиясы быйыл 3-апрелде “Чет элдик таасирдин ачыктыгы жөнүндө” мыйзам долбоорун кайра сунуштаган. Текстте “Чет өлкөлүк таасирдеги агент” дегендин ордуна “чет өлкөлүк күчтүн кызыкчылыгын көздөгөн уюм” деген термин колдонулат. Мыйзам долбоорунун калган бөлүктөрү өзгөрүүсүз калган.
Демилге, кирешеси, атап айтканда каржылоосунун 20%дан көбү сырт жактан келүүчү коммерциялык эмес юридикалык жактарды жана ЖМКларды каттоону карайт. Мындан тышкары, “чет элдик күчтөрдүн кызыкчылыгын” көздөгөн бардык уюмдар мамлекеттик реестрден катталууга тийиш.
Нааразычылыктарды тутандырган талаштуу мыйзам долбоорун Грузин парламенти 14-майда үчүнчү жана акыркы окууда жактырган. Ага 84 депутат “макул”, 30 депутат “каршы” добуш берген.
Өлкөнүн президенти Саломе Зурабишвили жана оппозиция долбоорго каршы чыгып, аны республиканын Евробиримдикке интеграциялоосуна тоскоолдук катары баалашкан.
Мыйзам долбооруна Зурабишвили кол коюудан баш тартып, ага вето койгон. Евробиримдик өлкөлөрү жана АКШ грузин бийлигин мыйзам долбоорун кабыл албоого чакырган.
Бирок эреже боюнча, өлкө башчы кол койбосо, спикер бул милдетти аткара алгандыктан, 3-июнда Грузия парламентинин спикери Шалва Папуашвили мыйзамга кол коюп, документ күчүнө кирген.
Мындан кийин АКШ грузин парламентинин айрым депутаттарына жана мыйзамдын кабыл алынышына тиешеси бар аткаминерлерге визалык чектөө киргизген. 24-июнда европалык дипломатиянын башчысы Жозеп Боррел Евробиримдик өлкөлөрү Грузия менен саясий байланыштарды кыскартууну жана өлкөнүн өкмөтүнө көрсөтүлгөн каржылык колдоону карап көрөрүн билдирген.



















