Кыргызстанды эми алдын ала 30-ноябрга белгиленген мөөнөтүнөн мурда парламенттик шайлоо күтүп турат.
Буга чейин шайлоого саясий партиялардын тизмеси боюнча 56, округ боюнча 34 депутат шайланып келген. Жаңыдан түзүлгөн 30 шайлоо округунун ар биринен 3төн депутат шайланып, мурдагыдай эле жалпысынан 90 мандат калтырыла тургандыгы иш жүзүндө маалым болду. Алар таркагандан кийин элди “шайлоо кандай өтөт” эмес, “шайлоого кимдер аттанат” же “эскилердин” келиш-келбеши кызыктырып, соң.тармактарда кызуу талкууланып жаткан учур. Анын үстүнө өзүн-өзү таркаткан парламенттин курамынын дээрлик 90 пайызынын кайра келүү ниетинин бардыгы талкууну ого бетер кызытты.
Мунун дагы бир себеби, буга чейинки бардык чакырылыштын депутаттыгына талапкерлер шайлоо учурундагы үгүт иштеринде элге аткарылышы мүмкүн болгон же болбогон ар кандай, мисалы “жол, мектеп же ФАП салып берем” деген сыяктуу элге керектүү болгон социалдык объекттерди убадалап келген болсо, келерки шайлоо үгүтүндө мунун бардыгына тыюу салынды. Ошол эле маалда өкмөт башында турган аткаруу бийлиги элдин муктаждыктарын чечүү үчүн ипотекалык үйлөрдөн баштап, Республиканын аймактары боюнча жол салууну, оңдоону жана социалдык объекттерди курууну колго алгандыктан, талапкерлер үчүн кандайдыр бир убадаларды берүүгө дагы мүмкүнчүлүк калтырбаган сыяктуу.
Шайлоо мыйзамдарына өзгөртүүлөрдү киргизген депутаттардын айтымында, талапкерлер эми үгүт иштеринде элге өзүнүн программаларын гана көрсөтө алышат. Бирок муну менен шайлоого аттанган талапкерлер элди ынандыра алышабы, кеп ушунда. Же “шайлоонун шайтан оюндарынын” жаңы ыкмасын ойлоп таап, буга чейин “добушун 1000 сомго сатып” көнгөн айрым жарандарды кайрадан колго алышабы, бул келерки шайлоо учурунда белгилүү боло турган иш.
Турдайым Кожомбердиева.



















