Нью-Йорктогу NYU Langone Health университетинин хирургдары дүйнөдө биринчи жолу адамдын көзүн толугу менен алмаштыруу операциясын жасашты. Бул тууралуу Reuters агенттиги билдирди.
Буга чейин дарыгерлер көздүн тунук челин гана алмаштыра алышкан.
“Көздү алмаштыра алганыбыздын өзү эле алдыга жасалган чоң кадам”, – деди дарыгерлер тобун жетектеген Эдуардо Д.Родригес.
Көзүн алмаштырган бейтап Арканзас штатындагы 46 жаштагы аскер ардагери Аарон Джеймс болго. Ал жумуш учурунда жогорку чыңалуудагы токко урунган. Окуянын кесепетинен анын бетинин сол тарабы, анын ичинде көзү, мурду жана оозу жабыркаган. Операция 21 саатка созулган.
Хирургдар трансплантацияланган орган операциядан бери “ден соолуктун таң калыштуу белгилерин” көрсөткөнүн айтышууда. Родригестин айтымында, жашоого жөндөмдүү көз алмасын трансплантациялоо көрүү калыбына келбесе дагы көптөгөн жаңы мүмкүнчүлүктөрдү ачат. Бейтап жаңы көз менен көрө алабы же жокпу, азырынча белгисиз.
NYU Langone Health университетинин дарыгерлер тобу буга чейин дагы 2021-жылы адамга чочконун бөйрөгүн биринчи ийгиликтүү трансплантациялашкан.
Эске салсак, ноябрдын башында АКШда генетикалык жактан өзгөртүлгөн чочконун жүрөгү салынган экинчи бейтап каза болуп калган. Бейтап трансплантациядан кийин алты апта гана жашаган. Чочконун жүрөгүн алган дүйнөдөгү биринчи адам да бир нече ай гана жашап, каза болуп калган.



















