УКМК тарабынан кылмыштардын бирдиктүү реестрине катталган сотко чейинки өндүрүштүн материалдарынын негизинде тергөө жана ыкчам иш-чаралардын алкагында, 2023-жылдын 26-декабрында Чүй облусунун бардык аймагында ломбарддардын ишинде Кыргыз Республикасынын мыйзамдарын сактоого багытталган тергөө-ыкчам иш-чаралары жүргүзүлдү.
Анын алкагында 40тан ашык күрөөканалар аныкталып, тиешелүү лицензиялык жана уруксат берүүчү документтер, күрөөгө коюлган талаптар жана акча каражаттарынын келип чыгышынын мыйзамдуулугу текшерилди.
Ошону менен бирге жүргүзүлгөн ыкчам-иликтөө иш-чараларынын жыйынтыгы боюнча бардык айыптык санкцияларды эске алуу менен пайыздарын минималдуу деңгээлге чейин төмөндөтүү жана 20 пайыздык чектик ставкадан ашпоо боюнча милдеттенмелер алынды.
Учурда аталган башкармалык тарабынан өлкөнүн мыйзамдарын бузган күрөөканаларды аныктоо боюнча ыкчам-издөө иш-чаралары улантылууда.
Белгилей кетүүчү жагдай, Улуттук коопсуздук боюнча мамлекеттик комитеттин төрагасы Камчыбек Ташиев 26-декабрда атайын кызматтын Москва райондук башкармалыгынын жаңы имаратын ачып жатып күрөөканалар маселесине токтолгон. Ал Кыргызстанда чоң үстөк пайыз менен акча берген күрөөканалардын ишин “элди тоноо” деп мүнөздөгөн. Ташиев бир нече күрөөкананы атап, эгер үстөк пайызы 30дан ашса, лицензиясын кайтарып алып, кожоюндарына мыйзам чегинде чара көрүлөрүн эскерткен.
14-декабрда Экономика жана коммерция министрлиги Кыргызстанда күрөөканалардын үстөк пайызын чектөө боюнча мыйзам сунуштап, Жогорку Кеңеш мыйзамдын долбоорун биринчи окууда жактырган. Экономика жана коммерция министри Данияр Амангелдиев Кыргызстанда күрөөканалардын үстөк пайызына эч кандай чектөө жок болгондуктан, каалагандай коюп жатканын белгилеп, мыйзам кабыл алынса, күрөөканалар жылына 32% көп коюм коё албай турганын айткан.
Финансы рыногун жөнгө салуу жана көзөмөлдөө кызматынын расмий сайтындагы маалыматка караганда, Кыргызстандын аймагында 440тан ашуун күрөөкана бар. Быйыл 11 айда ломбарддардан 70 миллион, былтыр 25 миллион 463 миң сом салык түшкөн.
Кыргызстанда буга чейин да көп пайыз менен карыз берген ломбарддардын иши талкууланган. 2021-жылы Финансы рыногун жөнгө салуу жана көзөмөлдөө кызматы өзүн күрөөкана деп атаган “Сомо” компаниясынын Кыргызстандын мыйзамдарынын талаптарына жооп бербеген бардык филиал жана өкүлчүлүктөрүн жабууга буйрук берген.



















