Саламаттык сактоо министрлигинин алдындагы Ден соолукту чыңдоо борбору ата-энелерге балага рюкзакты кантип туура тандоо керекти боюнча бир катар сунуштарды берди.
Мектеп буюмдарынын ичинен рюкзакты сатып алуу эң маанилүү жана жооптуу, анткени баланын ден соолугу жана коопсуздугу көбүнчө анын сапатынан көз каранды.
“Санитардык-эпидемиологиялык эрежелер жана ченемдер” боюнча ар кандай класстардагы окуучунун рюкзактарынын салмагы үчүн стандарттар бар. Стандарт боюнча окуу китептеринин жана жазуу куралдарынын салмагы төмөнкү көрсөткүчтөрдөн ашпоого тийиш:
- 1-2-класстын окуучулары үчүн – 1,5 кг;
- 3-4-класстар үчүн – 2 кг;
- 5-6-класстар үчүн – 2,5;
- 7-8 – 3,5 кг, 9-11 – 4,0 кг.
“1-4-класстын окуучулары үчүн окуу китептери жок эле рюкзактын өздүк салмагы 700 гр ашпоого тийиш. Рюкзактын боолорунун жазысы 4–4,5 см чейин болушу керек, бул баланын аркасына анын тыгыз орнолушун камсыз кылат. Аларды жасоо үчүн материал жеңил, бышык, сууну өткөрбөгөн, тазалоого оңой болууга тийиш. Окуучунун дене түзүлүшүн бузган факторлордун бири – бул оор рюкзак жана аны туура эмес колдонуу”, – деп айтылат маалыматта.
Маанилүү сунуштар:
- Эң оор жана эң чоң китептерди далыга жакыныраак жайланыштыруу керек;
- Омуртканын оң же сол жакка кыйшаюусуна алып келбеши үчүн рюкзактын эки (!) боосун тең асынуу керек, эч убакта аны колго көтөрүп же бир ийинге асып жүрүүгө болбойт;
- Далыга тыгыз көтөрүү үчүн рюкзактын боолорун тартып коюу керек;
- Окуучунун салмагынан 15% ашкан рюкзактарды сатып алуу сунушталбайт;
- Баланын боюна жараша көлөмдөгү рюкзакты тандоо керек: ылдый жагы белден өтүшү, ал эми үстүңкү бөлүгү баштын артына тийбеши керек;
- Рюкзакты чоңойгондо да асынат деп чоңураагын алуунун кереги жок, бул омуртканын кыйшайып кетүүсүнө алып келиши мүмкүн, демек жаш курагына ылайык тандоо зарыл;
- Көбүнчө окуучулар ашыкча китептерди жана дептерлерди салып алышат. Буга ата-энелер көз салуу керек. Анын салмагы нормадан ашыкча болбоого тийиш.
