Антониу Гутерриш уюм аймактык туруктуулукка жетишүүгө салым кошуп жатканын белгиледи
Шанхай Кызматташтык Уюму (ШКУ) эл аралык аренада маанилүү роль ойноп, аймактык стабилдүүлүккө жетишүүгө салым кошууда.
Уюмдун ишмердүүлүгүнө мындай бааны Астанадагы ШКУнун саммитинде “ШКУ+” форматындагы талкууга катыша турган БУУнун баш катчысы Антониу Гутерриш берди.
“Акыркы бир нече жылда ШКУ эл аралык аренада маанилүү оюнчу болуп калды. Ал жалпы коркунучтарга, анын ичинде терроризмге жана зордук-зомбулук экстремизмине жооп кайтарууну координациялоо боюнча өзүнүн баштапкы максатына берилген бойдон калууда. ШКУ ошондой эле аймактык коопсуздукту камсыз кылуу менен экономикалык интеграцияны жана көп тараптуу кызматташтыкты тереңдетүүгө умтулат” , – деди дүйнөлүк уюмдун жетекчиси Казинформ агенттигине берген маегинде.
Гутерриштин айтымында, дүйнө көптөгөн чакырыктарга, анын ичинде климаттык кризиске жана эл аралык чыр-чатактын курчушуна туш болууда.
БУУнун баш катчысы кризис учурунда өлкөлөр биригип, өсүп келе жаткан пикир келишпестиктерге каршы бирге иштеши керектигин кошумчалады.
“Аймактык уюмдар дүйнөнүн ар кайсы бөлүктөрүндө тынчтыкты камсыз кылууда жана колдоодо негизги ролду ойнойт. Алардын тажрыйбасы, тез жооп берүү мүмкүнчүлүктөрү жана түзүлгөн кызматташтык алкактары аларды чыр-чатактын алдын алууда жана тынчтыкты орнотууда алмаштыргыс кылат”, – деди Гутерриш.
ШКУнун саммити 3-4-июлда Астанада “Көп тараптуу диалогду чыңдоо – тынчтыкка жана өнүгүүгө умтулуу” урааны астында өтөт. Саммиттин негизги программасы эртеңки күнгө пландаштырылган. Азыркы тапта эл аралык жыйынга катышуу үчүн Астанага жогорку даражалуу лидерлер келип жатат.
БУУнун баш катчысы Казакстанга 3-июлда эртең менен келген. Буга чейин Гутерриш Алматыга да барары жана Казакстандын президенти Касым-Жомарт Токаев менен жолугушары маалымдалган. Бул баш катчынын Казакстанга экинчи расмий сапары. Биринчиси 2017-жылы болгон.
ШКУ 2001-жылы түзүлгөн. Анын курамына Индия, Иран, Казакстан, Кытай, Кыргызстан, Орусия, Тажикстан, Пакистан жана Өзбекстан кирет. Байкоочу өлкөлөр: Афганистан, Беларусь жана Монголия. Өнөктөш өлкөлөр: Азербайжан, Армения, Камбоджа, Непал, БАЭ, Түркия жана Шри-Ланка. Күтүлгөндөй, алдыдагы саммитте Беларусь ШКУга толук кандуу мүчө болот.


















