Улуу Британия Украинанын аймагына куралдуу контингентин жиберүүгө даяр. Бул тууралуу Улуу Британиянын премьер-министри Кир Стармер билдиргенин чет элдик маалымат каражаттары жазып чыгышты.
“Британия, керек болсо, башкалар менен бирге (Украинанын – ред.) асманына кургактагы аскерлерин жана учактарын жөнөтүүдө алдыңкы ролду ойнойт”, – деп баса белгиледи британ премьери.
Стармер Украинага аскер жиберүүгө даяр экенин дүйшөмбү күнү, 3-мартта парламентте сүйлөгөн сөзүндө Европа лидерлеринин Украинага аскердик жардам көрсөтүү боюнча жолугушуусунан кийин билдирди. Анын айтымында, Лондон Киевди колдоодо алдыңкы позицияны ээлеши керек.
Ошол эле учурда саясатчы мындай миссиялардын ийгиликтүү өтүшү үчүн АКШнын күчтүү колдоосу зарыл экенин баса белгиледи. Анын пикиринде, Европа өлкөлөрү Вашингтондун колдоосусуз Киевге ишенимдүү коопсуздук кепилдиктерин бере албайт.
Бирок Стармер Европа тынчтык орногондон кийин Украинаны куралдандырууну улантат деп убада кылды.
Буга чейин The Times гезити британ бийликтери Украинанын президенти Владимир Зеленскийди АКШ менен мамилени калыбына келтирүү үчүн колдон келгендин баарын кылууга чакырып жатканын жазган. Бирок 2-мартта Евробиримдиктин лидерлеринин чукул саммитине катышуу үчүн Лондонго барганда Зеленский Трамптан кечирим сурабай турганын айткан.
28-февралда Трамп менен Зеленскийдин Вашингтондогу сүйлөшүүлөрдө ортодо талаш-тартыш жаралып, Трамп Зеленскийди тынчтык сүйлөшүүлөрүнө даяр эмес деп айыптаган. Мындан кийин Зеленский Вашингтондон эрте кетип, ресурстук келишимге кол койгон эмес.
Европа лидерлеринин 2-марттагы Лондондо өткөн Украина боюнча саммити АКШ-Украина сүйлөшүүлөрү кайым айтыштан улам аягына чыкпай калганга чейин эле пландалган. Ага Евробиримдиктин жана НАТОго мүчө ондон ашык өлкөнүн лидерлери, ошондой эле НАТОнун баш катчысы жана Евробиримдиктин жетекчилиги катышты. Саммиттин катышуучулары Киевге аскерий колдоо көрсөтүүнү жана Орусияга экономикалык кысым көрсөтүүнү улантууну макулдашты. Евробиримдик өлкөлөрү да Украинанын ар кандай тынчтык сүйлөшүүлөрүнө катышуусун талап кылууда.
Эске салсак, буга чейин Канаданын премьер-министри Жастин Трюдо өлкөсү Киевге керектүү аскердик колдоо көрсөтүүнү улантарын жана канадалык аскерлерди Украинага тынчтык орнотуучу катары жөнөтүү маселеси каралып жатканын билдирген.
Орусия президентинин басма сөз катчысы Дмитрий Песков бейпилдик күчтөрүн киргизүү конкреттүү жаңжалдын тараптарынын макулдугу менен гана мүмкүн экенин белгилеген. Анын айтымында, алар тууралуу коңшу өлкөдө айтуу эртелик кылат.



















